BESAM 16 - Kalate Zambe Nnomo a Mfefe Mfefé Nkôñelan

Nti a ne ngabe ntili sam a nyô a kôté nye awu

¹ Ba'ale'e ma a Zambe! amu ma sobô be wo.

² Me jôya Nti na: Wo ô ne Zambe wom. Me nji bi beta mvaé mfe a dañe wo!

³ Azezambe ya *si nyô, mingungule me mbe me yene mvaé mite,

⁴ ba ke ôsu a kô'ôlane nsa wop; bôt ba tôñe be mvus. Ve ma ye bo te beta ve be binyunyui bi ne metyi, a biyaé biam bia ye bo te beta tote môé map.

⁵ A Nti, éli'i jam a ngabe jame y'élaé, wo ô bili asu'ulane y'ényiñe jam.

⁶ Asu'ulane dam e n'étua mvaé, ngabe me nga nyoñ nje ja dañ abeñ.

⁷ Ma ve Nti akéva, nyô a ne mbôndé mefe'e wom. To'o na a alu, nleme wom wo ye'ele ma.

⁸ Ma yene Nti éyoñ ése ôsu viam; amu a ne ma mfa'a ya mbo nnôm, nde me se nguleya fô'ôsan.

⁹ Ajô te nleme wom wo vak, a nsisime wom wo fôn; ja'ane nyôle jame fe ja wo'on e *mvo'é été.

¹⁰ Amu wo ye bo te li'i nsisime wom e vôme miñwuan mi né, wo ye bo te kañese na nyô wo dañe nye'e a yen awu.

¹¹ wo ye bo me na me yene *zen ényiñ, abui mevak e n'ôsu ya asu dôé, mefo'o ya nnôm éto ki mfa'a ya mbo nnôme wôé.