BESAM 149 - Kalate Zambe Nnomo a Mfefe Mfefé Nkôñelan

Duma bebuni

¹ Alléluia, ényiñ é bo'o jôme Nti! yi'ane duma Nti mfefé jia; be kañe Nti ékôane *bebuni été!

² Israél a va'ak; amu a ne nté wé ayoñ bôt ya Sioñ, aka'a avak! Amu a ne njôô wôé.

³ Be kañe Nti a *mebôk, be wumu'u nye a éduñe ngom a yian éduñ te a mvet é ne minsañ abui

⁴ Amu Nti a yene *mvo'é jé be ayoñ dé, a semé bôt be ne minlem évôvoé a nyii be.

⁵ Bebuni be bo'o abôk a ve Zambe duma! Be yôta'an a vak, ja'ana alu!

⁶ Asu Zambe, be bi ékaña'a anyu dab été, a mo map été nkpwaté mekôn, meyo mimfa'a mibaé!

⁷ Ba yiane kune bebien be *meyoñ ya *si nyô, a liti ayaa dap be *meyoñ me bôt.

⁸ Nde ba ye ka'a bejô bôt bap a bengôkop a futi beminisi ya éjôé bityé mebo.

⁹ Ba yiane liti be ntyi'ane mejô Zambe avale ane ô ne ntilan. E ne duma mfa'a *bebuni bese. Alléluia, ényiñ é bo'o jôme Nti.