BESAM 148 - Kalate Zambe Nnomo a Mfefe Mfefé Nkôñelan

Nkañane Zambe e * si nyô a e yôb été

¹ Alléluia, ényiñ é bo'o jôme Nti! Oyap yôp ya yôp, kañane Nti, kañane nye, mia mi ne yôp été wé.

² Kañane nye, mia be éngele bese, kañane nye mia minkane mié mise.

³ Kañane nye, jôp a ngon, kañane nye mia ateté ése da faé.

⁴ Kañane nye mia mefôla ya yôp ma dañ ôyap a mia fe mevis mendim ma beta dañe ôyap yôp.

⁵ Bise bi Kañe Nti amu a nga tote ve éfia jia, ane bise bi nga taté na bia nyiñ.

⁶ A nga telé bie bité nnôm éto, a telé be *atiñ da nde ba ye bo te tyam.

⁷ Ataté si, kañane Nti kañane nye mañ a bibibi ya mañ;

⁸ a mia fe, nduan a meta'a, nkuta nsum *nkut, évuñulu ôkôs, nje ja wôk ajô dé.

⁹ Kañane nye beta minkô a bone minkô, bilé bia wum bibuma, a be sédre bese,

¹⁰ Betit ya fé nge ba ya minlam, anon a biôm bia nyi'itan.

¹¹ Kañane nye, bejô bôt ya *si nyô, a mia fe *meyoñ mese, bone bejô bôt, beliti *zen ya *si nyô.

¹² Bobefam a bobebinga, bisoé, minnôm, kañane nye!

¹³ Kañane nye, amu nye etam a be'e jôé é ne anén, éto éjene jé é ne si a yôp ôyabe yôp.

¹⁴ A nga bulan ayoñe dé na é bo ngu a metameta'an a ne jôé é ne duma mfa'a *bebuni bé, mfa'a bibu'a bise ya Israél, ayoñ é ne nye bebé. Alléluia, ényiñ é bo'o jôme Nti!