BESAM 144 - Kalate Zambe Nnomo a Mfefe Mfefé Nkôñelan

Meye'elan me njô bôt

¹ Akéva A Nti, akôme dam. Nyô a ye'ele ma bita a kômesane ma na me wosan.

² O ne ndi nleme jam, jôm ja kame ma ôleme wom, vôm ma sobô ébene ja buti ma nye a futi *meyoñ mebo mam si.

³ Ve da Nti, môt a ne jé ane wo nyoñ ngap a nye' Mone môta binam a ne jé ane wo lañe nye tañ'

⁴ Môt a ne ve mvebe, ényiñe jé é ne ve nsisiñ wo lôt.

⁵ A Nti, vite yôp dôé a sise si; a sôso'o ônyu wôé, bo'o na minkô mi kui ôtita.

⁶ Wu'a feleves mesu mezen mese, lôme mekoñe bilaé môé mevôm mese.

⁷ Same wo wôé ôyap yôp ya yôp kôté'é ma, a vaa ma angôndô été a beta ngule mintyôa ya *meyoñ bikuu,

⁸ Mme menyu map me ne minsos a wo wo koñe ngana a nga kan.

⁹ A Zambe ma ye yia wo mfefé jia, ma ye se'e wo a mvet é ne minsañ awôm.

¹⁰ Zambe nye a ve bejô bôt mvolane wé, nye a kôté mbo ésaé wé David.

¹¹ Nyi'i ma a fansoñ é ne njet; wôlé'é ma mo *meyoñ bikuu ma, menyu map me ne minsos a wo wôé wo koñe ngana a nga Kan.

¹² Bobefam bangan be bo'ok ane biôm ba bé mbie bi nga faa tetele aso bongô! Bobebinga bangabe bo'o abeñ ane mbaane mekôn ma ve menda me njô bôt abeñ.

¹³ Mengun bidi mangan me jaék a bika'é mevale mese! Mbame bone biyeme wongan e mefup ô bo'o abui biyoñ toyini, ô bo'o abui biyoñ toyini awôm.

¹⁴ Mbame beta mbam biyem wongan ô yaék! Minkôm a nsa bi sa'ale'e bia. a miñyôn mia sale melo e mevôme bôte bese ba sulan!

¹⁵ Ebotan a ayoñ da bu'uban a mbamba be mam mete, Ebotan a ayoñ di Nti a ne Zambe wop.