BESAM 143 - Kalate Zambe Nnomo a Mfefe Mfefé Nkôñelan

A Nti, te kee ma aba mejô

¹ A Nti, vô'ôlô meye'elane mam ba'a alo éyoñ ma de'ele mo be wo. Amu ô ne ntôé mam a *zôsôô, yala'ane ma

² me ne mbo ésaé wôé, te kee ma aba mejô, amu teke'e môt a ne te bijô asu dôé.

³ Me bili nsiñ a tibili ma; a wuaya ma si nalé a tibi ma a mebo, a nyiñeli ma e dibi awu a bewu ya melu mvus.

⁴ Nde ma jañele de ndi *nlem ése me teke'e fe nguleya beta bo jam.

⁵ Eyoñ ma fas melu mvus, ma simesane mam mese ô nga bo, ma bindi mam ô nga bo ma me yené'é

⁶ ma same mo mam yôp e be wo a nde'elane me, ma wô'ôtane na me ne ôsu wôé aval ane si ja wôk évé.

⁷ A Nti, me te'eya, yala'ane ma te yange. Te lume ma mvus nalé momo, wôna ma ye bo môt a maneya.

⁸ Eyoñ tyé ja taté, kañete'e ma *mvo'é jôé amu me too wo mebun; bo'o na me yem zene fé ma yiane tôñ, amu ma kôñelan a fombô wo.

⁹ A Nti, wôlé'é ma be besiñe bam; me ne asoé éyoñ me ne wo bebé.

¹⁰ Ye'ele'e ma me bo jam wo yene mvaé, amu ô ne Zambe wom. nsisime wôé ô wulu'u ma mvo'é si é ne te jôme ya kolé ôbak.

¹¹ Amu ô ne Nti, bula'ane ma ényiñ. Wo ô ne te selan mengaka'a môé, ka'a ma éto étam étam été.

¹² Wo ô ne aka'a mvôé te dipe besiñ bam menyu nalé ma ye man a bôt be ne ma ngame yat, amu me ne mbo ésaé wôé.