BESAM 141 - Kalate Zambe Nnomo a Mfefe Mfefé Nkôñelan

A Nti, mombô'ô mejô ma ye kui ma anyu

¹ A Nti, ma loone wo, za'a avôl a volô ma, vô'ôlô nloone wom éyoñ ma kobô wo.

² Meye'elane mam me bete tetele a zu be wo, ane ôtita ya metuna'a meyemete me élé ma nyume mvaé a nja'an wom ane mveane ya mamengô'é.

³ A Nti, tebe'e mmombô ôsu ya anyu dam, a nonô *mbé ya biyaé biam.

⁴ Kama'ane ma na me ke vôm ase ma yi a kuli éfia é ne *abé, nge bo mbia jam éziñ, a vu bôt ba telé ba bevok minjuk été. Kama'ane ma na me bo te di belet éte.

⁵ Ma kañese na môt a ne *mvo'é a bibi ma, nge na môt a too wo mebun *a lep ma; nalé a ne mboone ya amvôé ñwô me vo'o ke ben; ve mbia mimboone ya mbia be bôt mi vo'o ke bo na meye'elan mam me tabe évô.

⁶ Me nga kobô teke'e meveñ; bôt ba siñe ma ba ye de yem éyoñ betyi'i mejô bap ba ye kômôtô akok.

⁷ Aval ane si ja kandane zañ, ayoñ ya miñwuan da ye kui anyu mine bives biap bi ne ntyamelan.

⁸ A Nti, e Zambe wom, e nne mise mam ma kôñelane be wo, e nne ma sobô be wo: Te yané ényiñe jam.

⁹ Kama'ane ma ô lame ba ba lame ma a minkok bebo mam *abé bete ba bôé ma *zen.

¹⁰ Mbia be bôt bete be timbi'i melam map bebien, ve ma, ma ye fam melam mete!