BESAM 140 - Kalate Zambe Nnomo a Mfefe Mfefé Nkôñelan

Meye'elan môt ba bôte mejô a ndaman éyôlé

¹ Sam David.

² A Nti, nyi'i ma mo me bôt ba simesan *abé mfa'a wom. Kama'ane ma mo me bôt be ne évô a ngu.

³ Ba simesane ve na be bo *abé, môse ôse ba tyak mintañete.

⁴ Ane benyo ba jep ayeme dap, be bili nsu akpwe biyaé biap si.

⁵ Ba'ale'e ma, me za ku mo me mbia be bôt; A Nti, kama'ane ma mo me bôt be ne évô a ngu, mbe ba simesane na ba ye tyase ma.

⁶ Bôt ba kobô ma ébiasé, be koléya ma ôlam, mfa'a ya bi ma be maneya ya minkol a mevot, a kolé melam e ngbwa'a *zen.

⁷ Ve ma jô Nti na: O ne Zambe wom. Ke'e alo éyoñ ma de'ele wo mo.

⁸ A Nti Zambe, wo ô ne vôm ma sobô a yene nyian; wo kama'ane nlô wom éyoñe mewosan.

^9-10 Te yalane minkômbane mbia be bôt A Nti, te kañese na mam ba ve'e befe'e me tôéban. Ba ba bômane ma ba liti na be ne njalan a abuk a be nga ka'a ma mbia jam. Mbia jam ate a tame bi bebien!

¹¹ Ma'a me nduan me kpwa'a be nyô. Zambe a bo'o na be bi'iti a ku nduan été, mbi'ili ñwô be se fe nguleya beta bet!

¹² Môt a bôte ma mejô a ndamane ma éyôlé a bo'o te tabe si été; a mbia jam a tôñe nye teke'e awo'on, môt a bo mam évô a ngu!

¹³ Wo tyik minzôzoé mejô *zôsôô, A Nti, ma yeme de wo bo bôt be ne éngôngol mam ne tiññ.

¹⁴ Yaa, bôt be too wo ndi ba ye kañe wo, A Nti, bôt be ne *zôsôô ba ye tabe vôm ô né.