BESAM 139 - Kalate Zambe Nnomo a Mfefe Mfefé Nkôñelan

A Nti, wo yeme mam mese, ma be ma

¹ A Nti, wo fombô édok ya nleme wom, wo yem jôm ése ja so be ma.

² Wo yem nge ma tabe si, nge ma tebe tetele; wo yem minsimesane miam ayap éyoñ e ngenan ôsu.

³ Wo yemelane nge me ne atan nge *nda jam, wo yeme mam mese ma bo.

⁴ Me ngenan te tot éfia jia, ô lô ô nga yem jôm ése ma kômbô jô.

⁵ Ô ne ma mvus, ô ne fe ma ôsu, wo beté ma wo wôé.

⁶ Na ô yeme ma, abime nkôñe te é ne étôto'o jam mfa'a wom, a da lôt jôm ése me ne nguleya wôk.

⁷ Ma ye ke wo ôyap vé' Nge tup wo, vôm me vo'o wo yen'

⁸ Nge ma bet yôp été, ô ne wé; nge ma bômbô ézezañ miñwuan ô ne valé.

⁹ Nge ma yele a ke mfa'a jôp da tôô, a nge ma ke tabe mfa'a jôp da dim

¹⁰ ja'ana valé, wo wôé wo bi ma, a wo wôé ya mbo nnôm ô nji suu ma.

¹¹ Nge ma jô na: Dibi e yanda'ane ma, a fefele jam *môs ô bo'o alu!

¹² Mfa'a wôé dibi da veñesan éfufup, a alu é ne éngengeñ ane *môs. Dibi nge éfufup, bise bi ne wo avale da.

¹³ Wo ô nga kôme mone môte wom, ô nga solé tiñe ma abum be nyia wom été.

¹⁴ A Nti, akéva amu ô nga bo nyôle jam angôndô ye beta étôto'o jam. Jam wo bo é ne teke'e akañete ma tu'a yeme nalé e be mone môte wom ya *nlem été.

¹⁵ Nyôle jam é nji bo *nsolane jam éziñ be wo, éyoñ ô nga mé ma asoé éyoñ ô nga tiñe ma abume be nyia wom.

¹⁶ Eyoñ me mbe te eyeka'a abum été wé, ô mbe ô lô ma, e zu koé na ô maneya tili kalate wôé été abime melu ô nga tiñeti ma, te na alu da ya melu mete é za taté'é.

¹⁷ A Nti, aval ayaé é ne ma na me yemelan mam wo simesan, ngo'o aka'a abui me né!

¹⁸ Me ne lañe me aya' Me ne abui a dañe mefes me nselek. Ja'ana ma kui susu'a ya mboone tañe wom, ma ye bo te mane wô'ô wo.

¹⁹ A Zambe, wo yiane mane jiane mbia be bôt a titane bewôé bôt bete ôyap a ma.

²⁰ Ba kobô wo mfa'a ya ndeñele, a tote jôé dôé mfa'a ya laa minsos

²¹ Ma wôk bôt ba wosane wo nyé; A Nti, ma siñe ba ba siñe wo.

²² Ziñ jam é ne ngumba mfa'a wop be ne mfa'a wom, besiñ bam mamien.

²³ A Nti, fombô'ô akui édo'o ya nleme wom, a yeme jam ese da so be ma. Ve'ele'e ma, a yemelane bido'o bi mam biam.

²⁴ Tuka'a yene na me nji ke kañe bezambe befe, a wulu'u ma e zene é nga too énjôé nnôm éto.