BESAM 132 - Kalate Zambe Nnomo a Mfefe Mfefé Nkôñelan

Siôn éto Nti, a tison David

¹ A Nti, simesa'ane David a njuk ôse a nga ve émien.

² David nye a nga kane ngana nyô na: E be Nti, ngaka'a nyô na: E be Zambe Yakob a ne ngu:

³ Ma tyili mamien nyiane *nda jam, a same nyôl énoñe jam,

⁴ a jô'é mise mam me dim a ke ve mon ôyo.

⁵ Nté me ngenan te yen éto mfa'a Nti wom a né *nda asu Zambe Yakob a ne ngu!

⁶ Bi nga wôk be jô'ô na: Ewolo é ne étyi é ne Efrata, bi nga koone je mefôla ya Yaar.

⁷ Bi tame nyiin *nda Nti, a bi kumbu si asu ételé mebo jé.

⁸ A Nti, li'ita'an Ewolo é ne étyi, vôme ngule jôé é too, a za'a vôme nyô, nye a ne nkômesan asu awo'one dôé.

⁹ Betuni bôé be beke'e zôsôô aval ane be be'e ngômesane jap; a *bebuni bôé be yôta'ane ayenga mevak!

¹⁰ Amu nye'ane ya mbo ésaé wôé David, te titane njô bôt ô nga beté mo.

¹¹ Nti a nga kane ngana nyô be David; a ye bo te tyame njôan ôte: Mone wôé wua nye ma ye top, a bo nye njô bôt a ye nyoñ éto jôé,

¹² nge a semé mintiñetane miam asu élat a mvinda ma ye ve nye, éyoñe te mone wôé émien nye fe a ye tabe éyoñe jé ane njô bôt éto njôô yôp, a nalé akui nnôm éto.

¹³ E ne nalé na Nti a nga top Siôn, a nga kômbô na a bo nye éto jé.

¹⁴ Nde a nga jô na: O lô vôme njô ane vôme ya awo'one dam nnôm éto, vôme nyô nye ma kômbô tabe.

¹⁵ Yaa me nga bo Siôn mvaé, éyoñ ma ve nye jôm a nyiñe je, a ma ye ve minzôzoé mié bidi bise ba nyamete.

¹⁶ Ma ye jalé betuni bé a nyian a *bebuni bé ba yôtan avak dap.

¹⁷ A Siôn, ma ye bo na njô bôt a ne ngu a bialé a so'o mvoñe bôt David. Aval ane lambe a yôñ ma ye yemete njô bôt me nga beté mo.

¹⁸ Ma ye jalé besiñe bé ôson ve ékate njô bôt jé ja ye faé be nye.