BESAM 12 - Kalate Zambe Nnomo a Mfefe Mfefé Nkôñelan

Zambe a ne mvolô, ñwosane bôte medu'an

¹ Sam David asu évete beyia bia; mbômane mvet é ne minsañe muam.

² Nyi'i ma, a Nti! amu bezôsôô be bôbe Zambe be nga man; *zôsôô a jañ a *bebuni ba man e bôt été.

³ Môt ase a kobô nyô mbok ve medu'an. Ba koban a bilene biyaé, a minleme mibaé.

⁴ Nti a tame tyi'i biyaé bilene bise a ôyem ôse via kobô ésas.

⁵ Ba ba jô na: Bi ne ngu amu ôyeme viangan. Biyaé biangan bi ne a bia; za a ne bo ane Nti wongan'

⁶ Eyoñe ji, nalé Nti a jô, amu bingôngole bi bôt bia tôban étibela'a a minzôzoé mia tat, ma kôlô si a ma soo nyian e be ba bôt ba titan.

⁷ Mejô me Nti me ne ma me ne bebela ane or a maneya tumbane mbe'e nduan melui, a nye a maneya fubane biyoñe zamgbwa.

⁸ Wo, a Nti, wo ye ba'ale be, wo ye kamane bia mfa'a ya mvoñ éte nnôm éto.

⁹ Bikotekote bi bôt bia wulu vôm ase, éyoñe mboon *abé ô nga jôô e be bone be bôt.