BESAM 118 - Kalate Zambe Nnomo a Mfefe Mfefé Nkôñelan

Meye'elan me mvean akéva amu ndañan

¹ Kañane Nti amu a ne mvaé, a amu nye'ane wé ô ne teke'e amané.

² Mia *meyoñ ya Israél beta'a ba'alane na; nye'ane wé ô ne teke'e amané.

³ Mia mvoñe bôt Aron, beta'a ba'alane na: nye'ane wé ô ne teke'e amané.

⁴ Mia mimfefé *bebuni mié, beta'a ba'alane na: nye'ane wé ô ne teke'e amané.

⁵ Eyoñ me li'iya étam étam édo'o été amu njuk, me nga loone Nti na a volô ma, a nga yalane ma, a ve ma éto fili.

⁶ Nti a ne éñwom, ma ye bo te ko jôm éziñ woñ: Bôte be ne bo ma jé'

⁷ Nti a ne éñwom, a volô ma; me lô ane ba be nga vini ma ba ku.

⁸ A ne mvaé ya ke ku mo be Nti a dañe na ô tabe môt mebun!

⁹ Ane mvaé ya ke ku mo be Nti a dañe na ô tabe beta be bôt ndi *nlem.

¹⁰ Bete yeme Zambe be nga bômane ma ve amu Nti me nga titane be.

¹¹ Njiñelete jap é nga beta bômane ma ne kpwok, ve amu Nti me nga tyamelane be.

¹² Be nga yametane ma ane ékaé mvôfôm, ve be nga dim ane nduan mimbop, a amu Nti me nga titane be,

¹³ be nga sô'ôlô ma na me ku si ve Nti a nga zu volô ma.

¹⁴ Beta ngule wom a ne Nti, a nga zu volô ma.

¹⁵ Nyôtan mevak amu nkôtan ô jaléya menda bindélé bebuni; wo ya mbo nnôm Nti ô ne ndañan,

¹⁶ wo ya mbo nnôm Nti ô ne mbetane yôp, wo ya mbo nnôm Nti ô ne ndañan.

¹⁷ Maa ye ke fo'o wu, ve ma ye nyiñ na me kañete jam Nti a nga bo ma.

¹⁸ E ne bebela na Nti a bôme ma, ve a nji ke jô'é me na me wu.

¹⁹ Di'ane ma mimbé mi ne asu ba ba buni, nalé me nyiin a kañe Nti!

²⁰ Mbé wo kee wô bebé be Nti wu: a *bebuni be nyi'ine ñhe été!

²¹ Ma ye kañe wo, A Nti, amu ô yalaneya ma, ô zuya volô ma.

²² Ako'o ya belôñe *nda be nga ben, nde é nga su'ulane bo tin ako'o ya *nda, ako'o ya jua.

²³ Nalé a so be Nti. E be bia é ne étua jam.

²⁴ Môs abôk wu ô ne mboone Nti, bi yôtan avak dangan, bi tame fôn.

²⁵ Eh! A Nti, za'a volô bia! Eh! a Nti, va'a bia ndañan!

²⁶ Zambe a bota'ane nyô a nyiñ vana a jôé Nti! ézezañ ya *nda jé é ne étyi été, bia kalane mia ébotane jé.

²⁷ Nti a ne Zambe a faé bia éfufub jé! Ta'ane minnoñ, mebui melene mo akekui meku'u me ata'a metuna'a.

²⁸ A Nti, ô ne Zambe wom, ma ye kañe wo, a Zambe wom ma ye yôtane anene dôé.

²⁹ Kañane Nti amu a ne mvam a nye'ane wé ô ne teke'e amané.