BESAM 112 - Kalate Zambe Nnomo a Mfefe Mfefé Nkôñelan

Avak ya mbamba môt

¹ Alléluia, ényiñ e bo'o jôme Nti! Ebotane a môt *a yem éjôé Nti, a yene mvaé ya bo jam a bendé nye!

² Bone bé ba ye bo si éte, amu Zambe a bo bôte bese be ne *zôsôô mvaé.

³ Môt ate a bili mbamba ényiñ a *nlem ô bôô nye si ne mieññ; amu a bili nkañesan Zambe nnôm éto,

⁴ éyoñ dibi é ne vôm ase. Efufup ja faé asu môt a ne *zôsôô, môt a ko Zambe woñ a ne *mvam a nko éngôngol,

⁵ môt a kôlé a nye'an, nye ñhe a ne mvaé, nye a wulu mam mé a semé metiñ!

⁶ Môt a ne *zôsôô a ye bo te bili atek; a ye lik jôm ba simesan é ne te jaé ntuk.

⁷ A nji ko mbia menyiñ woñ; a tabe Nti ndi, teke tyelé nleme yôp.

⁸ Teke'e tyendé asimesane dé, a yange yen ane besiñe bé ba ku teke'e ko woñ.

⁹ A ve bingôngole bi bôte biôm, a bili nkañesane Zambe nnôm éto, ngule jé ja kô'ôlan a duma dé ése.

¹⁰ Mbia môt a yene de a nga wôk *abé, a latane mesôñ a jañele mezene mé. Zam ya di ja tyi'i be mbia be bôt amu nalé.