BESAM 109 - Kalate Zambe Nnomo a Mfefe Mfefé Nkôñelan

Môt ba bo'olô a loone Zambe na a zu kamane nye

¹ A Zambe, e wo ma Kañ, te tabe évô,

² amu bôt be ne teke'e mbunan a teke'e *atiñ, belaa minsos ba bo'olô ma; a ke ba mias bibôta asu dam.

³ Mejô me ziñ map me bômaneya ma mimfa'a mise. Ba wosane ma teke'e akala'a.

⁴ Ba yalane nye'ane wom a bisoman, ve ke da ma ye'elane asu besiñe bam;

⁵ ba bulane *abé a mvaé, a ziñ mfa'a ya amvôé.

⁶ Ba jô ma na: Be va'a nye ayem ya ñwôane môt, a môt a bo'olô nye a tebe mbo nnôme wé!

⁷ Eyoñ ba ye tyik ajô dé, be yeme na a ne ñwôé bôt, a meye'elane mé me veñesa'ane jam da bo'olô nye!

⁸ A bi tyôtyoé melu ya nyiñ a môt mfe a nyoñe ésaé jé!

⁹ Bone bé be bo'o bobenyui a minga wé a bo'o nkus!

¹⁰ Bone bé be bo'o be minzezak a ke ba ndeñ, be tita'ane be *nda jap nje é nto bilik!

¹¹ Nsé memvôla a nyoñe jôm ése é ne énjé; a bejin ya *nda bôte jé be saak biôm bié!

¹² Môt éziñ a bo'o te liti nye mvaé nge ko bebenyui a ye lik éngôngo!

¹³ Mvoñe bôte jé é manek, a éyôlé jé é jañek e be miaé bôt wo zu!

¹⁴ Be beta'a vumelane Nti minkobane mi ésaa wé a émvame jé a jôm éziñ é bo'o te tyam *abé ya nyia wé!

¹⁵ Zambe a simesa'an éyoñ ése na, a vaa biyôlé ya bôte bete si nyôl!

¹⁶ Môt ate a nji bisi ntatane mboone jam é ne mvaé, ve a nga tôñesane *nzôzoé môt, éngôngol a nte'an abui nalé a ye jili nye.

¹⁷ A nga yene mvaé ya yo'é nde ñhe, biyo'é bi za'a be nye! A nji kômbô botan nde ñhe bibotan bi kôlô'ô be nye!

¹⁸ A nga tabe éboñeté ya biyo'é si, nde ñhe, bi yiane nye nyô ane mendim a nyiine nye nyô ane mbon!

¹⁹ Bi vute nye nyô ane éndélé a jaé bie nyô ane kandé jé.

²⁰ Tame yene mimboone ya ba ba somane ma e be Nti, a ba bôte ma mejô.

²¹ Ve wo, A Nti Zambe wom, bo'o ma mam a ndi *nlem ô too je be womien; mvame jôé nje ma yi, nyi'i ma,

²² me ne azoé a éngôngo, *nlem wom été ô ne ntuban a meveñ.

²³ Ma ke ôte'etek ane vôm nsisiñ wo man ba titane ma ane étandak ja ndeñele

²⁴ nté ôse ma bômbô zaé ya kañ, me te fe nguleya tebe tetele, mam ma tyi me maneya kôtô ma.

²⁵ Me ntoo jôm ékpwe'ele jap ja sôñ, éyoñ ba yene ma ba fô'ô nlô.

²⁶ A Nti Zambe wom, za'ak ô volô ma; amu ô ne mvaé, volô'ô ma.

²⁷ Bôte bana be yeme na: Wo ô nga bo nalé; wo, a Nti ô nga bo mam mana mfa'a wom.

²⁸ Be ne fo'o yo'é, ve wo, wo botan. Nge ba zu té ma, ba ye woban ôsone nyô, ve ma, mbo ésaé wôé, ma ye jaé a vak.

²⁹ Mfa'a ya ba ba somane ma, be jaé ôson ane alô'ô; ôsone viap ô buti be nyô ane éndélé!

³⁰ Ma ye kañe Nti a *tyiñ é ne njalan, a wumu Nye ézezañ ékôane bôt.

³¹ Amu a kôane mam ma yiane éngôngole môt mfa'a ya nyii nye mo me bôt ba ve nye mekua.