BESAM 105 - Kalate Zambe Nnomo a Mfefe Mfefé Nkôñelan

Nkañete ya ntôéan mame Zambe

¹ Kañe Nti, katane *tyiñ yôp za nye a ne Zambe, kañeta'ane *meyoñ mefe mimboone mié.

² Yi'ane nye bia, wuma'ane nye a bibômebômé, la'an minlañ ajô bitua bi mam bié.

³ Taba'ane nye mebun, Zambe a ne étyi, vakan minlem mienan été, mia bôt Nti a too be ndi *nlem.

⁴ Koñela'ane be Nti a ne ngul ése, jeñane vôm a né biyoñ bise,

^5-6 mia mia so be Abraham, mbo ésaé wé, mia bone be Yakob a nga top, simesa'ane bitua bi mam a nga bo, simesa'ane bitua bi mam bié mintyi'ane mejô a nga kobô.

⁷ Nti nye le, Zambe wongan, mintyi'ane mié mia nambe si ése.

⁸ A simesane na a nga tiñeti de nnôm a nnôm éto, a nga ve anyu dé, mfa'a toyini miaé mi bôt.

⁹ Ane ngaka'a a nga bo Abraham, ane ngana wé e be Izak,

¹⁰ ane ntyi'an a nga yemete be Yakob, ngaka'a ya nnôm éto asu Israél;

¹¹ éyoñ a nga jô nye na: «ma ve wo Kanaan, ngap é ne mia mveane le, wo a mvoñe bôte jôé».

¹² Bana be mbe tyôtyoé éyoñe te, be mbe mone nsamba beyeñ a suane nlam.

¹³ Be nga so ayoñ da a ke be ayoñ avok, a so éjôé jia a ke éjôé évok.

¹⁴ Ve Zambe a nji kañese na môt éziñ a tibili be, amu ajô dap, a nga lep bejô bôt:

¹⁵ Etyi te nambe ba me maneya telé étyi, nalé a nga jô; étyi te bo abé e be ba be ne bekalan ajô dam!

¹⁶ A nga bo na zaé é kui nlam, a bidi bi nga jemban.

¹⁷ Nde a nga lôme môt na a zu ôsu a kamane bôte bé: a mbe Yôsep nye be nga kuan *ôlo.

¹⁸ Be nga futi nye bibom mebo, be nga futi nye *tyiñ e nsanga étyé été,

¹⁹ akekui éyoñ ajô a nga nyoñ be Nti a nga liti avale môt a mbe.

²⁰ Ane njô bôt a nga bendé na be suu nye, nye'ele *meyoñ a nga bo na be tii nye.

²¹ A telé nye évet ya éjôé jé a mba'ale ya biôm bise a nga bili.

²² Ane a ye tebele be minisi ya éjôé ane a kômbô, a ye'ele ñyemane mam be minnôm belebe bôt ya éjôé.

²³ Ane Yakob a nga zu Ejipte, Israél fe a mbe nneñ sii Kam

²⁴ Nti a nga bo na ayoñe dé e fôé abui a bo ngul a dañe besiñe bap.

²⁵ Ane a nga veñesane bôte ya Ejipte asimesan, nde be nga siñ ayoñe dé, a jeñe na be du'u bôt a too be ndi *nlem.

²⁶ Nde a nga lôme mbo ésaé wé Môze a Aron, mbe a nga top.

²⁷ Be bebaé be nga bo bitua bi mam Zambe a nga jô be na be bo e be bôte ya Ejipte, e si Kam be nga bo bitua bi mam njalan a ñye'elan,

²⁸ Zambe a nga bo na dibi e zu, ane nlam ô nga jok alu été, a teke'e môt a nga sôane njôane wé.

²⁹ A nga tyendé mendim na me bo metyi, a bo na kos ése é mbe été é wu;

³⁰ nlam ô nga jaé a minkongo a kui ja'ana bitune menda bejô bôt.

³¹ A njôane Zambe, minlo, mi mia di'i a binyônyoñ bi nga kui a jaé si éte ése.

³² Eyoñ a nga yiane lôme mveñ a viane lôme meta'a, a zo'oyañ, nje é nga futi nduan si jap;

³³ a nga ndamane mindi'i mi woon a bilé bi figié, a buk bilé ya mefôla mete.

³⁴ A njôan Zambe ôfe, bitandak bi nga su'an a bemba'a be wulu dulu teke'e alañé,

³⁵ be nga mine jôm ése é bili ôkaé a jôm ése ja faa si.

³⁶ Asu'ulan, Zambe a nga bo na mintôl mi bone mise ya menda me bôt ya Ejipte mi mbe bitôtoo bi ésaé ya ngule jap mi wu.

³⁷ Ane a nga vaa émbéé, be too njalan a moné a or, *meyoñ map été teke'e môt a mbe a kelek a dutu'u mebo mé si.

³⁸ Si ya Ejipte bôt be nga vak amu nkôlane wop Amu woñe bôt be nga ko be ô mbe ngul.

³⁹ Mfa'a ya kamane be, Zambe a nga ndamé nsum *nkut, a alu, nduan é nga ve be éfufup.

⁴⁰ Ve be nga sili bidi, ane Nti a nga bo na abem e zu, a jalé be a fembé ya yôp.

⁴¹ Ane a nga kui akôm, mendim me nga sôé, a dañe *nkôte si ane beta ôsôé.

⁴² A nga simesane ngaka'a é ne étyi a nga bo mbo ésaé wé Abraham.

⁴³ Minlem mi bôt ya ayoñe dé mi nga fôn a mevak éyoñ a nga vaa be, ba a nga top be nga yôtan a mevak.

⁴⁴ Nde a nga ve be mesi *meyoñ bikuu, a be nga bu'uban a ésaé *meyoñ me bôt,

⁴⁵ nalé be ba'ale ve metiñ mé étam a yemete miñye'elane mié. Alléluia, Enyiñe é bo'o jôme Nti.