BESAM 104 - Kalate Zambe Nnomo a Mfefe Mfefé Nkôñelan

Akéva e be Zambe nté

¹ A Nti ma ve wo akéva! aka'a anen ô né, a Nti wom, a Zambe wom wo jalé womien étôtok a éjijin.

² Wo jalé womien alô'ô éfufup. Nyô a ndamé yôp ane éndélé ya ébem;

³ O nga telé étaba'a jôé é beta dañ ôyabe yôp, minkut mia volô wo ane bikalik bita, wo wulu a mefabe bivuñulu.

⁴ Wo nyoñ bivuñulu ane minlôman, nduan ja saane wo.

⁵ O nga telé si mimbôka'a mié yôp; teke'e angôndô, amu évo'o ke fô'ôsan.

⁶ Mañ me nga buti *si nyô ane alô'ô, mendim mé me nga bet akui abôbôn minkô.

⁷ Ve ô nga sise me, ane me nga tup; a *tyiñ ndume mveñ ane me nga mate

⁸ a bet mebôbôn, a siliki mimbi'ili si akekui vôm ô nga tiñeti me.

⁹ Ane ô nga tyi'i nné ma ye bo te dañ, a bo te beta bulan a yandane si.

¹⁰ Wo bo mendim ya menjeñ na me bo atôñ, nde da lôt ézezañ minkôl été.

¹¹ Betit bese be ne nguleya zu nyu de, a éjakas ya afan ja tyi'i évé valé.

¹² Anon é bili mumba'a bebé valé, a da yia e solô e mekaé bilé

¹³ A so ôyap yôp ya yôp wo noo mveñ minkôle yôp; wo fombô na si é bi abui mendim.

¹⁴ Wo wo bo na bilok bi faa asu biyem, a bibébéa ya bôt ba saé mefup. Nalé si ja ve be jôm ya di;

¹⁵ a woon a ve be avak, a mbon mfa'a ya ve asu émumun, a fembé asu ya ve be ngule nyôl.

¹⁶ To'o beta bilé bi bili mendim ma yiane bie besédre ya Libañ, e mbe ô nga bé, a Nti!

¹⁷ Bone be anon ba zu a lôñe mumba'a map, a bingobingo a lôñe mvô'ô jé élé sipré yôp.

¹⁸ Minkôle mi ne ôyabe yôp mi ne asu bikela ya mefan, a mekôm me ne mesoé bidungila.

¹⁹ O nga kôme ngon mfa'a ya yemelan melu me ngon, a jôp, nde da yem awolo da dim.

²⁰ Wo lôme dibi, ô lô alu e ntoo, awolo betit ya fé ba fô'ôsan.

²¹ Bitoñ bengbwemgbwem bia bam a leñ betit ba ye bi, a ba sili wo Zambe bidi biap.

²² Eyoñ jôp da tôô, ba kôlô a ke bô'ôbô si bibô'a biap.

²³ Eyoñe te môt a kui atan *nda jé a ke ésaé a wu njuk akekui mamengô'é,

²⁴ A Nti, aka'a ndam ésaé jôé é né! Aka'a atyeñ ô nga bo bie bise! Si é jaéya a biôm ô nga té.

²⁵ O lô mañ, anen, mis teke'e asu'u. Biôm bi vee bi bi ne anen a tyôtyoé bia fô'ôsan été, a be se nguleya lañe bie.

²⁶ Be sitima ba wulu été mevôm mese, nalé fe dragoñ ya mañ a Léviatañ, ô nga té nye na ô bo nye bivôé.

²⁷ Biôm bise bia yange ane bia ye nyoñe bidi be wo éyoñe ja yian.

²⁸ Nge ô ve be bie, be nyoñe bie, nge ô kui wo, be mbili jôm ése ja yian.

²⁹ Ve nge ô bené, bese ba su'ulane si; nge ô beta nyoñe be mvebe ya ényiñ. Ba wu a beta bulane mbuluk.

³⁰ Wo bulane be mvebe, ô lô ba beta tééban a jôm ése ja bo mfefé e si bi too nyô.

³¹ Etôto'o jôé, A Nti, é tabe'e nnôm éto! Va'ak amu mam ô boya!

³² Wo fombô si, a ô lô ja fô'ôsan; wo nambe minkôl a anyu, a ô lô mi nto njalan a ôtita.

³³ A Zambe wom, ma ye yia wo bia ényiñe jam ése, ma ye kañe wo nté ma ye tabe si nyô;

³⁴ A Nti, miñwô'ôtane miam mi yene mvaé be wo, ve ma, ma wô'ô aka'a mvaé na me bili wo ane Zambe!

³⁵ Ba ba lume wo mvus ba yiane jañe *si nyô. Bôte be ne te mbunan a te metiñ be bo'o momo! Yaa, ma kômbô ve wo akéva, a Nti Alléluia. Enyiñ é boo jôme Nti.