BESAM 103 - Kalate Zambe Nnomo a Mfefe Mfefé Nkôñelan

Ma kômbô ve Nti akéva

¹ Ma kômbô ve Nti akéva, a nleme wom ôse, ma kômbô ve Zambe ane étyi akéva

² Yaa, ma kômbô ve Nti akéva a bo te vuane jame da ya mbamba mimboone mi mam mié

³ E Nye a jame bikobe biôé bise, a saé akone dôé ése,

⁴ nye a vaa wo *mbé soñ, a fôlé wo a jalé wo mvaé ése.

⁵ A jalé ényiñe jôé a mam me ne mvaé, a bo wo mfefé ésoé môt, nalé ô nto ane ndôé éyoñ ja yele.

⁶ Nti a zu mfa'a ya sôan bikotekot, a tyi'i ba bese ba kpwe'ele mejô *zôsôô!

⁷ A bo na Môze *a yem minsimesane mié a ayoñe Israél beta mimboone mié ya kam.

⁸ Nti ane nko bôt éngôngol a *mvam, a ne ôjibi a angônda mbamba *nlem.

⁹ A nji komekane bôt biyoñ bise, a ne te ba'ale ziñ nnôm éto.

¹⁰ A nji yaa bia ane é nga yiane bia, a nji bo na bi ya'ane tañe ya minkobane miangan.

¹¹ Aval ane yôp da dañe *si nyô ôyabe yôp, nalé mvaé jé é ne be ba bese be too nye ndi *nlem.

¹² Nkandane ô ne zañe jangan a mbia mimboone miangan ô ne, ane nté ô né zañ jôp da tôô a jôp da dim.

¹³ Nti *a nye'e bebuni bé, ane ésaa *a nye'e bone bé.

¹⁴ Emien, a yeme jôm be nga té bia je. a ne te vuane na bi ne metek.

¹⁵ Enyiñe môt ja bo na bi simesane bilok, bilok ya mefup, mbie bia taté sam,

¹⁶ nje ja viele éyoñ évuñulu é ne ayôñ ja lôt, a ja jañ teke'e lik awaé.

¹⁷ Ve mvaé Nti, asu ba be too nye ndi *nlem, é too nnôm éto, a ja ye tabe nnôm éto. A *zôsôô wé a nto ngap ya bone be bone bap,

¹⁸ nge ba semé minjôane mi Elat a simesane bo jam Zambe a nga bendé.

¹⁹ Nti a kômeya éto njôan jé yôb été, a jôô biôm bise bi vee.

²⁰ Mia be Engele bé, va'ane Nti akéva, mia bete mia bo jam a jô, a wô'ô nye te mfete, a ngule jenan ése.

²¹ Va'an Nti akéva mia nsamba mewosan bebo bisaé bé wo jalé jam ése a kômbô.

²² Va'an Nti akéva, mia bese a nga té, vôm ase mi too éjôé jé si. A ma fe ma ye jô na «Akéva a Nti!»