BESAM 102 - Kalate Zambe Nnomo a Mfefe Mfefé Nkôñelan

Môt a li'iya étam étam a ndi nlem

¹ Meye'elan me éngôngol môt é te'eya, ja liti ñyône wé be Nti.

² A Nti, vô'ôlô'ô meye'elane mam, nyône wom ô betek a kui be wo!

³ Te solé ma asu dôé e *môs me ne ôlun été ke'e alo dôé be ma e môse ma loone wo, yala'ane ma avôl.

⁴ Amu melu mam ma jañ ane ôtita, bivese biam bi maneya dik ane ési'i nduan.

⁵ Aval ane élok é ne ntyi'an, nleme wom wo kôt. a me nga vuane di.

⁶ Amu abui ntat, e nde ékôbe jam é nga late bives.

⁷ Me nga funan éngbwañ ya *nkôte si, a me nto ane nduk ya bilik.

⁸ Ma tabe évévé an'étam ônon é bete andil.

⁹ Nté *môs, besiñe bam ba té ma mintañete, mbôlô ba wô'ô ma ôlun, be nga kalane minkaa e nlô wome yôp.

¹⁰ Asup e nde é ne bidi biam, jôm ése ma nyu é ne mfula'ane a mili'i mam.

¹¹ Abui ayaa dôé été a ôlun, ô beteya ma a wua ma ôyap.

¹² Melu mam ma ke ane nsisiñ. a me nga kôt ane élok.

¹³ Ve wo, a Nti, ô ne njôô nnôm éto, a miaé mise mia ye kobô ajô dôé.

¹⁴ Wo ye kôlô si amu nye'ane wo nye'e Siôn, amu éyoñ é kuiya na ô ko nye éngôngo. Yaa, éyoñ é kuiya fo'o!

¹⁵ Bia bebo bisaé bôé bia nye'e meko'o mé, a mbuluk wé wo dutu ñwô'an éngôngole wop.

¹⁶ Meyoñe bikul ma ye ko jôé Nti woñ, a bejô bôte bese ya si étôto'o jé,

¹⁷ éyoñe Nti a ye beta lôñe Sioñ, a éyoñ a ye yené étôto'o jé été!

¹⁸ Eyoñ a ye kôñelan mfa'a meye'elane mimbubua te fe beta bene mie

¹⁹ Be ba'ale'e jame dina ntilan asu miaé mi bôt mia zu, nalé ayoñe dé é ne mfefé ntéan da ye kañe Nti.

²⁰ Nti a nga vitibi a too vôma étyi wé a ne ôyabe yôp Nti, ataté môp, a nga fombô si,

²¹ asu ya vô'ôlô ntate mimbôk, a suu ba be nga tyi'iban mejô na ba yian awu.

²² Ba ye yôtane jôé Nti Siôn été, a yia bia y'ékaña'a e Yérusalém.

²³ Eyoñe *meyoñ a bijôé bia ye sulan asu ya kañe Nti.

²⁴ Eyoñ me mbe ézezañe mbile wom a nga mane ngule jam a bo ényiñe jam étun.

²⁵ Jame te nde ma yôn «Zambe wom, wo ô too aso nkañete ya *si nyô, te vaa ma teme teme ényiñ été.»

²⁶ Melu kôa, ô nga té si, yôp é ne ésaé ya mo môé.

²⁷ Biôm bite bise bi aye jañ, ve wo ô too. Bia ye mane bo mintuk ane ngômesan, ve wo ye tyendé bie aval ane jôme môt a jaé, Bia ye li'i biôme bife éto jap.

²⁸ Jôm ô né e nje le, a mimbu miôé teke man. Bone bebo bisaé bôé ba ye je'an éto

²⁹ a memvoñ me bôte map ma ye tebe ngu asu dôé.