BESAM 10 - Kalate Zambe Nnomo a Mfefe Mfefé Nkôñelan

Meye'elane ya ja'é nkuane bikotekote bi bôt

¹ A Nti amu jé wo teb? ôyap' Amu jé wo sobô biyoñ y'ôlun'

² Mbia môt, e mebune mé été, a tôñe bingôngole bi bôt; bi ne mimbime ya mbia mefek a nga bôndé.

³ Amu na mbia môt a se'e émien amu a biya jôm a sôñ; mvus éte a nji botane Nti, ve viane yo'é a biasé nye.

⁴ Ekotekote môt ja jô a *nkpwala ôse anyu dé na: Zambe a nji ve *melep! Zambe a nji bo! Asimesane dé ese nde le.

⁵ Mezene mé ma kabe éyoñ ése; mintyi'ane mejô miôé mia dañ ôyabe yôb asu ya koone nye, mvebe wé wo wosane besiñe bé bese.

⁶ Ja jô e nleme wé été na: Me yeme ne zeñ, maa ye ndeñ, amu ma ye bo te tôbane bidim akekui miaé mise!

⁷ Anyu dé e ne njalan a biyo'é, a medu'an a mvô; bidim a ékotekote ntyi'ane mejô bi n'ôyeme vié si.

⁸ A teb'asoé bebé minlam, a wôé môt a ne te bijô e mevôm me n'étam. Mise mé ma bol éngôngole môt.

⁹ A mombô asoé e vôm a n'étam ane ngbwengbwem ébô'a jé, a mombô na a bi éngôngole môt atemetem, a bi éngôngole môt atemetem éyoñ a dutu nye avote dé été.

¹⁰ A kumbu, a vitibi, a bingôngole bi bôt bia ku e ngule jé été.

¹¹ A jô e nleme wé été na: Zambe a vuan! A solé asu dé, a ne teke fombô!

¹² Kôlô'ô si, a Nti! a Zambe, bete'e wo wôé yôp, te vuane besili bebiene si!

¹³ Amu jé ékotekote môt ja biasé Zambe' Amu jé ja jô e nleme wé été na: Ô ne teke ve *melep'

¹⁴ Ve wo ô yeneya éndeñela'a a mintaé mi éngôngol môt; a ô bôô évevé ya nyoñ ajô dab e wo wôé été; éngôngole môt ja suu ébiene be wo. Wo wo volô monenyui.

¹⁵ Bu'u wo ékotekote môt, tame yaa évô jé a a jañek e mise môé!

¹⁶ Nti a ne njôô nnôm éto a nnôm éto; bôt be ne te yeme Zambe be maneya jiaban e si jé.

¹⁷ Wo wô'ô minkômbane besili bebiene si, a Nti! Wo ve minleme miabe ngu; wo kee alo dôé

¹⁸ asu ya tyi'i monenyui a nyô ba tibili ajô, nalé ate môt a nga nyoñebane metek a ye bo te beta bo éko woñ.