BERÔMEÑ 9 - Kalate Zambe Nnomo a Mfefe Mfefé Nkôñelan

Israél ntobane Zambe

¹ E be Krist, ma kobô benyaa mejôô. Me nji laa minsos. Mone môte wome ya *nlem a ne ngaa nalé, e Mfufube Nsisim été.

² Me bili beta ôlun, a mintaé mi ne teke amané.

³ Yaa, me nga ye yene mvaé ya bi biyo'é na mamiene me bo nkandan a Krist amu bobejañ, e ba ya ayoñe dam, mbialan e minsôn été.

⁴ Mbe be ne Israél, benyoñe ngabe ya éto *bon, a étôtok a bilat, a mveane metiñ, a bisaé bi nkañan, a mengaka'a.

⁵ E mbe bemvamba be ne émbap. Nne Krist a nga bialé mvoñe bôt éte mfa'a minsôn, nye ate a ne mbetane yôp a dañe jôm ése. Zambe a bo'o ébotane nnôm éto. Amen.

⁶ Ve nalé a nji bo aval ane nge ajô Zambe da selan. Yaa, e ne été na, saa ba bese be ne mvoñe bôt Israél mbe be ne Israél.

⁷ A na, mfa'a ya bo mvô'ô Abraham, bese be nji bo bone bé momo. E mvoñe bôt Izak nje ja lobane mvoñe bôte jôé.

⁸ Nalé a ne na, saa ba be ne mbialane minsôn, mbe be ne bone be Zambe, ve ba be ne bone be ntiñetan, mbe ba lañeban ane mvoñ.

⁹ Amu ngaka'a é mbe avale dina na: Aval éyoñe di, ma ye beta zu e be wo, a Sara a ye biaé mon.

¹⁰ A saa ve abime te étam, ve nalé fe Rebeka a nga nyoñ abume dé e be Izak émvame jangan.

¹¹ Jame ya semé na, bone bete be ngenane te bialé, nge tame bo mvaé nge *abé, ve mbôle ya na, fe'e Zambe é tabe, fe'e jé éte nje é nga taté yené, amu fili ntobane wé. A ntoban ôte, ô nji timbi amu mimboon mi mam, ve amu nyô a loon.

¹² E nga jôbane be nye na: Ntôle wo ye tabe éjôé mone ya mvuse si.

¹³ Aval ane e ne ntilane na: Me nga nye'e Yakob, a me nga ben Esô.

¹⁴ Nde, bia ye jô aya, ye ékotekot é ne be Zambe? Teke bebé.

¹⁵ Amu a jô Môze na: Ma ye mvamame nyô ma kômbô mvamane nye. A ma ye ko éngôngo e nyô ma kombô ko éngôngo.

¹⁶ Ajô te a nji bo ajô nkômban, nge mveane ngule ya môt, ve ajô mvame Zambe.

¹⁷ Nalé ate nye ntilane wo jô, mfa'a Faraoñ na, me nga telé wo, fo'o ve amu na, e ngule jam é yené a na, e jôé dam da ye katebane si ése.

¹⁸ Ajô te, a mvamane nyô a kômbô mvamane nye, a bo e nyô a kômbô na a bi ayete *nlem.

Eto * nti Zambe. Israél a * zôsôô a so be Zambe

¹⁹ Môt a ye jô na, nge e ne nalé, a beta ve mekua amu jé? Za a ne ngule ya kange nkômbane wé'

²⁰ O ne za, wo môt, wo fetane Zambe? Ye Jôm é nga kômbane ja ye jô nyô a nga kôme je na, ô nga kôme ma ana amu jé'

²¹ Nge na, ye mmé meviek a nji bo *nti ya mé a éte'e jé mevie'e mevok, e mam ma sili duma, e ma mevok, zesé meviek'

²² Bi ne jô jé, nge Zambe a nga kômbô liti ayaa dé, a na be yeme ngule jé a nga jô'é mevie'e me ayaa, amu abui njibane dé, mme mete me mbe bebé ya jañ:

²³ nalé, amu na, bôte be yem abui étôto'o dé e be mevie'e me *mvam, e mme mete a nga naan, a kôm asu étôtok.

²⁴ Bia, bete a nga loon, saa ve ézezañe Beyude étam, ve nalé fe e be bikuu.

²⁵ Jame te nde a kobô anyu be Ozé na: ayoñe bôt e nji bo éndam, ma ye loone de na, ayoñe dam. A nyô a nji nye'eban, ma ye loone nye nyô ma kôme nye'e.

²⁶ A vôm e nga jôban e mfa'a wobe na: mi nji bo bôte bam, ba ye lobane na bone be vevea Zambe.

²⁷ Ezayi fe a yôtane na: ja'ane tañe bone be Israél é nga ye bo abima nselek ya mañ, *mebuka'a mme ma ye nyiiban.

²⁸ Amu Nti a ye tôé nkobô wé ôse a avôl ese *si nyô.

²⁹ Ajô te nde Ezayi a nga taté kulu mejô vôm a jô na: nge Nti ya *minsamba mewosan a nga ye bo te li'i bia mvoñe bôt, bi nga ye bo ane Sodom, bi funa'ane Gomor.

³⁰ Nde bia ye jô aya? Ve na bikul, e bi bi nji tôñe *zôsôô, ve be nga nyoñe nye, e ne na, e *zôsôô a so amu mbunan.

³¹ Ve Israél a nga jeñ *atiñ e mbe ngule ya ve nye *zôsôô, ve a nga tyame metiñ.

³² Amu jé nalé? Amu be nji jeñe nye a mbunan, ve be nga buni na, be ne bo *zôsôô amu mba'alane metiñ. Ane be nga ku ako'o yôp,

³³ ane e ne ntilane na: tame yen, ma bôôé e Sioñ été, ako'o ya kolé ôbak. Ako'o da kpwe'é bôt. Ve nyô a buni, nye a ye bo te veban ôsone nyôl.