BERÔMEÑ 7 - Kalate Zambe Nnomo a Mfefe Mfefé Nkôñelan

Mbuni a nji bo metiñe si

¹ Nge na, a bobejañ, ma kobô ba ba yeme metiñ: ye mia dimi na, *atiñ da jôô môt ve nté a ngenan a vee'

² Aval ane nga fame, nté nnôm a vee, a ne metiñe si e be nye. Ve nge nnôm a wôé, a nji fe bo metiñe ya alu'u te si:

³ nalé a ne na, nté nnôm a vee, nge a lu'u fame fe, a ye lobane na minga *mejian. Ve nge nnôm a wôé, a lu'u fame fe, a ye bo te fe lobane minga *mejian, amu a nji fe bo e metiñe ya alu'u te si.

⁴ Avale te mi né, a bobejañ. Amu mi nga wu mfa'a metiñ, amu mi ne nlatan a nyôle Krist, nye a nga wu e señe jenan, nde mia ye bobane ba be môte mfe, nye a ne nyô a nga wômô miñwuan; nde bia ye wume bibuma mfa'a Zambe.

⁵ Ya! Eyoñe bi nga too e minsôn, minkômban mi ne *abé mia belane metiñ, bi nga bo ésaé e bibu'a ya menyôle mangan, ndembene bi wume bibuma bia kee bia awu.

⁶ Ve éyoñe ji, amu bi kôtébaneya mfa'a metiñ, bi ntoo miñwuan e be jôm bi nga too minkôme mié, ajô te bia bo ésaé e mfefé éjôé ya Nsisime si, saa fe éjôé éto belo ya metiñe si.

Mfi metiñ

⁷ Nde bia ye jô aya, ye metiñ me ne *abé? Teke bebé! Amu me nga yen *abé ve amu metiñ. Me mbe te ngule ya yeme miñyamete, nge metiñe me nga ye bo te tyili miñyamete.

⁸ Ve *abé e nga yen atyebe ya futi fulu miñyamete mevale mese e be ma, a zene metiñ. Amu nge ntee metiñ, ve *abé e ne éwuwua jôm.

⁹ Me mbe me nyiñik melu mvus tee metiñ. Ve éyoñe metiñ me nge so, ane *abé ke e nga vebe, ve ma me nga wu.

¹⁰ Eyoñe metiñ ma yiane kee ma ényiñ e nga yené mfa'a wom na me ke awu.

¹¹ Amu *abé e nga yen atyebe, ane e nga du'u ma a zene metiñ. A amu me, e nga kee ma awu été.

¹² Ajô te metiñ me ne *mfuban a memvinda me ne fe *zôsôô a mvaé.

¹³ Nde, ye jôm é ne mvaé é vianeya té awu mfa'a wom? Teke bebé! Abé nde e nee ajô. Mbelane e nga belane jôm é ne mvaé, nde e nga kee ma awu été, ajô te da ye tu'a yené *abé a litibane fo'o abim avé *abé e ne angôndô a zene memvinda.

¹⁴ Yaa, bia yeme na, metiñe me ne jôme Nsisim, ve ma, me ne minsôn, nkuaban ane *ôlo abé.

¹⁵ E ne fo'o na, me nji wô'ô jame ma bo. E jame ma kômbô bo, me nji bo de. Ve jame ma vini nde ma viane bo.

¹⁶ Nde, nge jame me nji kômbô nde ma bo, wôna ma kañese metiñe na me ne mvaé.

¹⁷ Nalé ate, saa mamiene ma bo de, ve *abé e to e be ma.

¹⁸ Amu ma yeme na, e be ma, e ne na, e minsône miam été, mvaé é nji bo. Nkômbane ya bo mvaé ñwô ô ne be ma, ve saa ngule ya bo je.

¹⁹ Amu saa jam e ne mvaé ma kômbô bo, nde ma bo, ve *abé me nji kômbô bo nde ma viane bo.

²⁰ Nalé ate, nge jame me nji kômbô bo nde ma bo, saa ma ma bo de, ve *abé e too be ma.

²¹ Ma yen atiñe dina na, ma ma kômbô bo mvaé, ve *abé nde e ne be ma.

²² Ma nye'e atiñe Zambe e mone môte ya nleme wom été.

²³ Ve e bibu'a biam été, ma yen aval *atiñ afe, nde da wosane atiñe ya nleme wom wo kañese. Atiñe te da bo ma mbô'ô atiñe ya *abé e ne bibu'a biam été.

²⁴ Aka'a éngôngole môte me né! Za a ye vaa ma e nyôl awu nyôna été.

²⁵ Akéva e bo'o e be Zambe, amu Yésus Krist Nti wongan. Ajô te, me ne mbo ésaé atiñe Zambe e nleme wom, ve a minsôn, me ne mbo ésaé *atiñ abé.