BERÔMEÑ 5 - Kalate Zambe Nnomo a Mfefe Mfefé Nkôñelan

Mekabe, élat a ényiñ

¹ Amu bia lañeban ane bezôsôô be bôt amu mbunan, bia be Zambe bi ntoo *mvo'é amu Yésus Krist Nti wongan.

² E be nye, a zene ya mbunan, bi mbili anyiin e mvame Zambe a tabe je été. A bi bili mevak me ndi nleme ya étôto'o Zambe.

³ A fe na, ja'an e mintaé miangan été, bi bili ndi *nlem a mbunane na, mintaé mia kô'ôlane njiban,

⁴ a njiban wo ve ngul e *meve'ele été; a njibane *meve'ele wo biaé ndi *nlem.

⁵ A ndi *nlem é ne te soo mejôba'ane, amu nye'ane Zambe ô nga miaseban e minleme miangan, a Mfufube Nsisim a nga vebane be bia.

⁶ Yaa, éyoñe te bi ngenan atek, Krist a nga wu asu mbia be bôt éyoñ é mbe ntiñetan.

⁷ E ne ayaé na, môt a wu ajô zôsôa môt. Ndô'ôtô môt a ne jibi wu ajô mbamba môt.

⁸ Ve Zambe a liti abim avé *a nye'e bia vôme nyôna na: éyoñe te bi ngenane bebo mam *abé, Krist a nga taté wu amu ajô dangan.

⁹ Nge bi mbili mekabe éyoñe ji amu metyi mé, biyoñe tañeya bia ye bo ngule ya sa'ale ayaa Zambe.

¹⁰ Bi nga too besiñ be Zambe, ve bi maneya bo élat a nye, a zene ya awu mone wé, biyoñe tañeya, éyoñ bi ntoo nlatan a nye, bia ye nyiiban amu ényiñe jé.

¹¹ A fe na, bi nto mebune be Zambe amu Nti wongan Yésus Krist, amu jôé dé, bi nga bo élat bia be Zambe.

Adam a Yésus Krist

¹² Ajô te, aval ane *abé e nga nyiine *si nyô amu môte wua, a amu *abé te, awu e nga zu. Amu nalé, awu e nga kui e be bôt bese, amu bese be nga bo *abé.

¹³ Valé Zambe a ngenane te ve Môze metiñ, *abé e nga too *si nyô. Ve mbôle metiñ me nji tabe, Zambe a nji leb *abé.

¹⁴ Ve da, ataté Adam a kui Môze, awu e nga too, ja'ane be bôt be nji bo aval *abé Adam a nga bo, nye a mbe éve'ela'a nyô a nga yiane zu e melu ôsu.

¹⁵ Ve akôsa bo nalé, mveane *mvam ô vo'o ve'ane wu nleban. Amu zene nyôna na, nge amu *abé môte wua, awu e nga zu e be bizu'u bi bôt, abim avé *mvam Zambe, nyô é nga vebane be môte wua, Yésus Krist, ja ye veban abui abui e be bizu'u bi bôt.

¹⁶ Nalé fe na mveane zesé Zambe wo selan *abé môte wua a mam ma tôñ été. Ntyi'an ajô wo su'ulane mekua, ve minkoban abui amu mveane mvame Zambe, môt a su'ulane kabe.

¹⁷ Amu nge amu nkobane môte wua, awu e nga zu jôô, abim avé ba ba nyoñ abui *mvam a mveane *zôsôô e be Krist étam étam, ba ye jôô ényiñ été.

¹⁸ Tyi'ibi na, amu nkobane môte wua, bôte bese be nga nyoñe mekua, avale te fe amu mboone *zôsôô môte wua, mekabe ma ve ényiñ e be bôte bese.

¹⁹ Amu melo me môte wua, bizu'u bi bôt bi nga bobane bebo *abé, avale te fe amu mewô'ô me môte wua, bizu'u bi bôt bia ye kabe.

²⁰ Metiñ me nga zu ane minkoban mia ye bo abui. Ve vôm *abé e nga bo abui, vôm ate *mvam é nga dañedañ.

²¹ Nalé ate, aval ane *abé e nga jôô a kui awu, nde te amu *zôsôô, *mvam ja jôô asu ényiñe ya nnôm éto, amu Yésus Krist Nti wongan.