BERÔMEÑ 4 - Kalate Zambe Nnomo a Mfefe Mfefé Nkôñelan

Abraham ésaa bebuni

¹ Nde bia ye jô aya ajô mvamba wongan Abraham? Jé nje a nga nyoñ a zene minsôn'

² Nge Abraham a nga kabe amu mimboone mi mam, wôna a bili éfia ya bo je mebun, ve saa ñhe asu Zambe.

³ Yaa, ntilan wo jô jô aya? Wo jô na: Abraham a nga bi mbunan mfa'a Zambe, ane ô nga lañebane nye *zôsôô.

⁴ Amu môt a bo ésaé, e ma'ane mé me nji lañeban ane mveane *mvam, ve aval ane jôm é ne énjé a yiane nyoñ.

⁵ Ve mfa'a môt a nji bo ésaé, ve buni môt a kale mbia môt, mbunane wé wo lañebane nye *zôsôô.

⁶ Amu nalé David a kobô ajô môte Zambe a lañe *zôsôô, saa amu mimboon mi mam, vôm a jô na:

⁷ Ebotan a ba bikotekot biap bi ntoo *njaman, a mam *abé map me nto mbutan;

⁸ ébotan a môt, nyô Nti a ye bo te ta'asan *abé.

⁹ Ye ébotane ji é ne ve asu ba be ne ntyi'ibane metye, ye é nji bo fe asu ba be ne minsôso? Bia jô na: Mbunan Abraham ô nga lañebane nye mfa'a *zôsôô.

¹⁰ Ve nsili ô ne na: E nga bobane nalé a za zene? Ye ôsusua, ye mvuse ntyi'an atyele wé? Sa mvus ve éyoñe te a ngenane te tyi'iban atyel.

¹¹ Ve ndeme ntyi'an atyel é nga vebane be nye aval ane sitame *zôsôô a nga nyoñ amu mbunan, éyoñ a nga to nsôso. Ajô te ñhe a nga boban éyoñe jia jia ésaa bebuni bese be ne minsôso, ane *zôsôô ke a ne lañebane be be,

¹² a *bebuni be ne ntyi'ibane metye, mbe bete, saa ve amu be ne bôte ya mvoñe bôt é ne ntyi'ibane metyel étam, ve amu ba ba'ale fe mbunane ésaa wongan Abraham, te yen a za tyi'iban atyel.

¹³ E ne bebela: saake amu mba'alane metiñ, v'amu *zôsôô a so amu mbunan, nde ngaka'a ya nyoñe si ane ngap é nga veban e be Abraham a e mvoñe bôte jé.

¹⁴ Nge amu mba'alane metiñ nde ba bo benyoñe ngap élik, wôna mbunan wo volô jé, a *zen éte, ngaka'a é ne momo.

¹⁵ Amu metiñ ma dutu ayaa. A vôme metiñ me nji bo, ntyamane metiñe ke ô ne momo.

¹⁶ Ajô te ngaka'a é nga veban amu mbunan, nde ja ye bo mveane zesé Zambe mfa'a mvoñe bôt Abraham ése, sa mfa'a ba ba ve metiñe mewôk étam, ve nalé fe mfa'a ba bese ba buni, aval ane Abraham a nga buni, Abraham a ne ésaa bia bese,

¹⁷ aval ane ntilane wo jô na: Me nga bo wo ésaa meyoñe me bôt abui. A ne ésaa wongan asu nyô a nga buni; e Zambe a wômôlô miñwuan a bo biôm bi ne momo na bi tabe.

¹⁸ A ntabane ndi nleme mfa'a jôme môt a mbe te ngule ya ve'e fe'e ya tabe je mebun, ve nye, a nga buni, a su'ulane bo ésaa *meyoñ abui, aval ane njôane wuna na: Nalé e mvoñe bôte jôé ja ye bo.

¹⁹ A nji bo bisô amu nyôle jé, akôsa bo a ntoo bebé ntete mimbu a minga wé Sara, wua ane nyô mbôk, be mbe ane miñwuan mfa'a miaé.

²⁰ Be nji sôane ngaka'a Zambe. Ve be nga bo ngule minlem, amu mbunan a ve Zambe duma.

²¹ Be mbe njalan a ndi nleme na e jame Zambe a tiñetiya, a bili ngule ya tôé de.

²² Amu ajô te mbunan ôte ô nga lañebane nye mfa'a *zôsôô.

²³ Amu na, sa ve mfa'a wé étam, nde ntilan wo jô na: E nga lañebane nye.

²⁴ Ve nalé fe mfa'a wongan, bia bete mbunan wo ye fe lañeban, amu bia fe bia buni nyô a nga wômôlô Nti wongan e miñwuan;

²⁵ nyô a nga wu ajô minkobane miangan a wômô mfa'a mekabe mangan.