BERÔMEÑ 3 - Kalate Zambe Nnomo a Mfefe Mfefé Nkôñelan

Melo Beyude bôte bese bebo abé

¹ Mekômba'a ya kômbô mone Beyude me ne ñhe vé? A mfi ya ntyi'ane atyel ô ne jé'

² E ne beta mfi mimfa'a abui! E jam ôsu na: E mbe Zambe a nga taté liti minsolane mi mame mié.

³ Nde jé, nge bevok be nga bo te buni, ye ayete minleme dap da ye bo mba'alane bilate Zambe momo'

⁴ Teke bebé! Zambe a yiane yené ane nyô benya mejôô, a môt ase ke nlaa minsos. Aval ane e ne ntilane na: Wo yiane yené *zôsôô mfa'a ya nkobô wôé, a dañ éyoñ ba tyi'i wo ajô.

⁵ Ve nge ékotekote jangan nje ja bo na zôsôa Zambe a ngônôbô, bia ye jô aya? Ye Zambe a ye bo tee bijô éyoñ a bibi bia ayaa dé été? Ma kobô aval ane bôt be ne simesan.

⁶ Ve e nji bo nalé. Amu nge e ne nalé, Zambe a ye tyi'i *si nyô mejô aya'

⁷ Amu nge duma Zambe da so amu minsos miam, ma ye beta nyoñe mekua aval ane mbo *abé aya'

⁸ A na, jé é nga ye kame bia na bi bo *abé éyoñ a ne na, mvaé ja ye su'ulan, aval ane bebôte bôte mejô ba futi bia bifia anyu? Bôte bete ba yiane mekua!

⁹ Nde jé, ye e ngenane beta mfi na môt a bo ve mone Beyude ane bia? Teke bebé. Amu bi maneya liti na bese: Beyude a Begrék, be ne éjôé *abé si.

¹⁰ Aval ane e ne ntilane na: Teke *zôsôô môt éziñ a né, teke ve wua wua.

¹¹ Teke'e môt a ne fek, teke wua a jeñe Zambe.

¹² Bese be ntoo ndaman a nzametan amu *abé. Teke môt éziñ a bo mvaé, teke wua wua.

¹³ Bingoñe biap bi ne beyôyoo mesoñ. Ba miase minsos a ôyeme viap. Nsul akpwe ô ne biyaé biabe si.

¹⁴ Menyu map me ne njalan a biyo'é bi ne ayô.

¹⁵ Mebo map me ne avôle ya ke kuli metyi.

¹⁶ E ntu'ulane mam a bidim bi ne ôsu ya mezene map.

¹⁷ Ve be ne te yem e *zen é ne *mvo'é.

¹⁸ Teke nkoone Zambe woñ ôsu viap.

¹⁹ Amu bia yeme na, e mame mese metiñe ma jô, ma jô me mfa'a ya ba be nee metiñe si. Nde anyu ese da ye diban, a *si nyô ése é nyoñe mekua asu Zambe.

²⁰ Amu ajô te teke môt a ye kabe asu dé amu mba'alane metiñ. Mvolane metiñ ô ne ve na be yem *abé. E ne été na, metiñ ma bo môt a yeme na a boya *abé.

Mekabe amu mbunan

²¹ Ve éyoñe ji, te late lat a metiñ, *zôsôô Zambe a maneya yené. Metiñ a bekulu mejô ba kale nye.

²² A ne e *zôsôô Zambe a so e be Krist Yésus, mfa'a ba bese ba buni. Amu nkandan ô nji bo.

²³ Amu bese be nga bo *abé, a be ne nsubane duma Zambe.

²⁴ Ve ba kabe zesé, a *mvam, amu ésaé *nkôtan, njalane be Krist Yésus.

²⁵ Nye ate a nga ve a bo metuna'a a metyi mé, a zene mbunan, ane a ye liti jôme *zôsôô a mbe, amu a nji ve *abé ya melu kôa *melep,

²⁶ melu njibane wé. Ajô te a liti *zôsôô wé e zia biyoñe nyô, a nyiñ a mbunane be Yésus.

²⁷ Nde ye jam éziñe ya bo de mebun e ne? Teke bebé, e too ane jé? Ye mimboone mi mam? Teke fo'o jôm, fo'o ve amu mbunan.

²⁸ Bia liti ne sañesañ na: Môt a kabe amu mbunan, saa amu mimboone mi mame ya metiñ.

²⁹ Amu nge sa nalé, ye Zambe a ne ve Zambe Beyude étam? Ye nye a nji bo Zambe bikuu? Yaa! A ne fe Zambe bikuu.

³⁰ Eyoñ e ne na, nye étam a ye kale ba be ne mintyi'ane metye a zene mbunan, a kale fe ba be ne minsôso ve a zene mbunane fe.

³¹ Nalé a jô aya, ye bia vaa metiñe mfi wop? Momo, ke bia yemete yemete me.