BERÔMEÑ 2 - Kalate Zambe Nnomo a Mfefe Mfefé Nkôñelan

Zôsôa ntyi'ane mejô Zambe

¹ Ajô te ô nji bi éfia ya kabe je, wo, avale môt ese ô né, a wo wo ve môte mfe mekua, wo kpwe'ele womien. Amu womien wo bo avale mame te.

² Amu ba yeme na, ntyi'ane mejô Zambe wo boban e benya mejô? été, e be ba bese ba bo avale mame te.

³ Ye wo simesane na, wo wo ve ba ba bo avale mame te mekua, ô bo'o fe ane be, wo ye sa'ale ntyi'ane mejô Zambe'

⁴ Nge na, ye wo biasé abui afu nleme Zambe, abui njibane dé, a abui ésôs dé, ô vuane na, abui afu nleme dé te e ne mfa'a ya dutu wo na ô kôñelane *nlem'

⁵ Amu ayet nleme dôé, te kômbô kôñelan, wo naane womien abui ayaa, éyoñe *môs ayaa wo ye kpwaan, ñwô ôte zôsôa ntyi'ane mejô Zambe a ye yené;

⁶ nye ate a ye ya'ane môt ase aval ane mimboone mi mame mié mi né.

⁷ Enyiñe ya melu mese e be ba bese, amu mbane wop ya bo mvaé, ba jeñe étôtok a duma, a jôm é ne te tyendé.

⁸ Ve ayaa a ôson, mfa'a ba, mbe bete, amu nkañgane wop, ba bene benya mejôô, a suu bebiene si ékotekot été.

⁹ Mintaé a woñ bia ye zu e be môt ase a bo *abé, Beyude ôsusua, wôna Begrék.

¹⁰ Etôtok, duma, a *mvo'é bia yange nyô ase a bo mvaé, ôsusua Beyude, wôna Begrék.

¹¹ Amu nsemane mingume mi bôt ô nji bo e be Zambe.

¹² E ba bese be nga bo *abé te yeme metiñ, ba ye fe wu tee metiñ. E ba bese ki be nga bo *abé be bili ñyemane metiñ, ba ye tyi'ibane mejô a éfufube metiñ.

¹³ Amu na, saa ba ba wô'ô metiñ a melo, mbe be ne *zôsôô e mise me Zambe, ve ba ba ba'ale me, mbe ba ye kabe e mise me Zambe.

¹⁴ Eyoñe bikul bia bo e mam metiñ ma jô aso abialé, be te yeme metiñ, be ntoo metiñ e mfa'a wobe bebien, akôsa bo be nji bi metiñ.

¹⁵ Ba liti na, nkômbane metiñ ô ne nkpwelane minleme miap. Mone môte ya minleme miap a ne fe ngaa, a *zôsôô ya minleme miap a ve be bijô nge kale be.

¹⁶ Nalé nye a ye yené, ane Mbamba Foé wom ma kañete a né, e môse Zambe, e be Yésus Krist, a ye tyi'i mboon ôse ya bôt ô ne nsolan.

Melo me Israél

¹⁷ Ve nge wo, ô be'e jôé mone Beyude, ô ye'e *atiñ a tabe mebun e be Zambe wôé,

¹⁸ wo wo yeme nkômbane wé, wo, amu ô nga yé'é ane metiñ, wo yeme kandé jôm é ne fo'o nyaa.

¹⁹ Wo wo liti na ô ne nliti zene mindindim, éfufube ya ba be ne dibi été,

²⁰ ô ne ñye'ele bedimi mam, a ñye'ele ayôme bongô. Wo ô bili édo'o ñyemane benyaa mejôô ja so metiñ été;

²¹ ajô te, wo wo ye'ele môte mfe, ve te ye'ele womien! Wo ye'ele bôte na te wup, ve womien ô wubuk!

²² Wo tyili bôte mboone *mejian, ve womien ô bo'o *mejian! Wo vini nkañane bezambe befe, ve ô nyoñe biôme ya menda me *zambe map.

²³ Wo bo mebun amu ñyemane metiñ, ve wo biasé Zambe amu ntyamane metiñe wôé.

²⁴ Ve aval ane e ne ntilane na: Jôé Zambe e ne mbiasebane be meyoñe bikuu amu mia.

²⁵ Teke bisô, ntyi'iban atyel ô ne mfi, nge wo ba'ale metiñ. Ve nge wo tyame metiñ, ntyi'iban atyele wôé été, ô ne fe ane môt a ne nsôso.

²⁶ Ve nge môt a ne nsôso, a ba'ale metiñ, ye nsôsole wé wo ye bo te lañebane nye ane ntyi'iban atyel'

²⁷ Nyô a ne nsôso mfa'a minsôn ve a ba'ale'e metiñ, a ye ve wo mekua, e wo ô bili kalate metiñ, ô too fe ntyi'an atyel e minsôn, ve ô tyame metiñ.

²⁸ Ajô te saa melitane ya atan e mme ma bo mfañe mone Beyude, nge ndeme ntyi'an atyele ya minsôn ja yené a mis, nje é ne jôm ébien ntyi'an atyel ô né.

²⁹ Ve jôm é ne nsolan nje é ne mone Beyude a, ntyi'an atyel ô ne wu ya *nlem, e wu wo so Nsisim, sake metiñ, nyôlé ate a ne môt a nyoñe mese'esa saa be bôt, ve be Zambe.