BERÔMEÑ 12 - Kalate Zambe Nnomo a Mfefe Mfefé Nkôñelan

Mféfé ényiñ e be Krist

¹ Ajô te a bobejañ, ma ye'elane mia, amu nkoon éngôngole Zambe na, mi ve menyôle menan ane vevee étyi'a, étyi e ji Zambe a yene mvaé. Nalé ate a ye bo nkañane wônan wo yian.

² Te mia vu si ndôn ya melu ma. Ve bo'one mveñesan, zene ya tyendé ñyemane wônane mfa'a ya yemelan jé é ne nkômbane Zambe. Nalé nye ane mvaé a nya *mvo'é e mise mé.

³ Amu *mvam é nga vebane be ma, ma jô môt ase ya be mia na: A bo te simesan émien a lôte nné, ve simesan aval ane mfefek, te bo énguñ; môt ase aval ane abime mveane Zambe a nga ve nye e né.

⁴ Amu bi ne bibu'a abui, e nyôle jia été. A bibu'a bise bi nji bi aval ésaé da.

⁵ Avale te bi ne abui, ve bi too nyôle jia e be Krist. Bi too bibu'a, jia a ji évok, môt ase ngabe jé.

⁶ A bi bili mvean aval a ne *mvam é nga veban e be bia. Ye ô ne wu ya kulu mejô? Bela'ane wô a mbunan.

⁷ Ye môte wua a bili mvean ésaé? A bo'o ésaé. Ye mfe a bili mveane ya ye'ele? A ye'ele'e.

⁸ Aval ane mfe, e wu ya leb, a lebek! Nyô a ve a va'ak a ésôs. Nyô a jôô, a bômbô'ô évevé ya jôô. Nyô a ko bôt éngôngo, a bo'ok a mevak.

⁹ Nye'an ô bo'o te medu'an. Mata'an *abé beta mmatan; kabeta'ane mbaa be mam.

¹⁰ Nye'ane ya bobenyañ ô late mia wua a nyô mbok. Bômba'an évévé ya semane mia mia.

¹¹ Bo'one Nti bisaé ayôñ e ne tee njem été, e Nsisim wo kundi été.

¹² Va'an e ndi *nlem été, jiba'an e biyoñe bi ôlun, a bo mbane meye'elan été.

¹³ Mi vola'ane mimfufup mi ne mebua été, jika'a boon anyep.

¹⁴ Bota'an a te yo'an.

¹⁵ Va'an a ba ba vak, yian a ba ba yi.

¹⁶ Bo'on ôsimesane wua, wua a nyô mbok. Sa'alane beta binyiñ, ke'ane minleme mienan e mam me ne si. Te yenane miabebien ane mimfefek.

¹⁷ Te butane môt *abé a *abé. Bômba'an évevé ya bo bôte bese mvaé.

¹⁸ Nge e ne ngule ya bo, aval ane da yiane mia, taba'ane bôte bese *mvo'é.

¹⁹ Te kunane miabebien a bôte ma nye'e, ve jôka'an ayaa Zambe e bo ésaé. Amu e ne ntilane na: Akuna'a e ne éndam, ma ma ye ya'ane bôt, nalé Nti a jô.

²⁰ Ve nge nsiñe wôé a wô'ô zaé, va'a nye bidi. Nge a wô'ô évé, va'a nye jôme ya nyu. Amu a mboone te, wo kutane nye ma'a me nduan e nlô yôp.

²¹ Te jô'é na *abé e dañe wo, ve dañe *abé a mboone mvaé.