BERÔMEÑ 11 - Kalate Zambe Nnomo a Mfefe Mfefé Nkôñelan

Zambe a nji bene bôte bé

¹ Me nga sili ñhe na, ye Zambe a nga bene bôte bé? Teke bebé! Mamien me ne Israél mvô'ô Abraham, ayoñe Bényamin.

² Zambe a nji ben ayoñe dé a nga taté yem. A na, ye mi nji yem ane ntilan wo jô, vôme Elie a soman Israél e be Zambe na:

³ a Nti, be nga wôé bekulu mejô bôé, a tyame meta'a metuna'a môé. Ma étam me nga li'i, a ba jeñ ényiñe jam.

⁴ Ve Zambe a yalane nye aya? Me nga ba'ale mfa'a wom mamien, befame toyini zamgbwa, e ba be nga bo te kute meboñe si asu Baal.

⁵ Nalé fe melu ma, *mebuka'a m'éziñ me ne fe, aval ane fili ntobane ya *mvam é né.

⁶ Nge e ne amu *mvam, wôna, a nji bo ajô mimboone mi mam. Amu nge nalé, wôna *mvam é nji fe bo *mvam.

⁷ Nde bi ne jô aya? E jôme Israél a jeñ, a nji bi je. Ve mintobane mi bôt mi nga bi je. Ve mfa'a ba bevok, be nga boban ayete minlem,

⁸ aval ane e ne ntilane na: Zambe a nga ve be Nsisim ô ne ékôkôt, a mise na, be bo te yen, a melo na, be bo te wôk, a zu kui môse wu.

⁹ David a jô fe na: e tawôlô wop a bo'o ôlam a avot, a jôme ya kolé ôbak a *melep me ne *zôsôô!

¹⁰ E mise map me bo'o dibi akekui ma ku ndim. Bo'o be éyoñ ése na, be vite memvuse map e si.

Fe'e Zambe mfa'a Beyude a bikuu

¹¹ Nde ma sili na: Ye be nga kolé ôba'a na ba ye ku nkuane nkuan? Teke bebé! Amu nkuane wop, nde bikul bi nyiibaneya. Ajô te, ba ye soñelô *aban, e nleme Israél été.

¹² Amu nge nkuane wop ô nga bo afok mfa'a *si nyô, a nsuubane si wop, afo'o ya e be bikuu, abim avé nyoñane ngabe wop e nyian wo ye dañe soo mvaé.

¹³ Nde ma kobô mia bikuu, amu mamien me ne *nlôman e be bikuu. Ma liti étôto'o ya ésaé jam,

¹⁴ a ndi nleme jame na, ma ye soñelô *aban e minleme ya ba bia be be bi ne mbialan a nyii bevok.

¹⁵ Nge e ne na, ntebane wop e fefe, ô nga bo élat mfa'a *si nyô, e nyian été wop wo ye bo jé, ke ve ntulan awu a kui ényiñ'

¹⁶ Amu nge *bembômô be ne étyi, wôna ngum ébase fe ô ne étyi. A nge ndi ô ne étyi, mintyaé mi ne fe avale da.

¹⁷ Ve nge mintyaé miziñ mi nga tyi'iban, ve wo, ôlivié ya fé, ô nga bemban e mintyaé mivo'o mi nga li'i ôlivié ya nlame na, wo fe ô nyoñe ngap afo'o ndi ya nya ôlivié.

¹⁸ Te bo mebun ézezañe mintyaé. O ne bo ngunguan, ve sa wo ô be'e mindi, ve ndi ñwô ô be'e wo.

¹⁹ Yaa, wo ye fo'o jô na, mintyaé mi nga tyi'iban amu na me bemban été.

²⁰ E ne été nalé. Mi nga tyi'iban amu bijabô biap, ve wo ô ne été amu mbunan. Te bo mebun, ve viane ko woñ.

²¹ Amu nge Zambe a nga bo te kamane benya mintyaé, avale da a ye bo te kamane wo.

²² Ajô te, semé'é mvame Zambe a ayo'o dé bibaane; ayo'o dé mfa'a ya ba be nga ku, a mvame jé mfa'a wôé. Ve nné ane wô wo tabe e mvame te été, nalé momo, wo fe wo ye tyi'iban.

²³ A be, nge be nji langan e te buni wob été, be fe ba ye bemban. Amu Zambe a bili ngule ya beta beme be.

²⁴ Nge wo ô nga vas, ôlivié ya fé, nye ate ô nga too amu abialé, ô nga viane bembane nya ôlivié, nye ate ô nji bo, amu abialé dôé, kô fé be ba ye bemban ôlivié wop be nga beme été amu mbialane wop.

Nyian Israél ase

²⁵ A bobejañ, me nji kômbô mi dimi ndimba jame nyô, a za bo na mia ye nyoñe miabebien ane mimfefek. Ayete nleme bevo'o ya Israél, da ye tabe akekui bôte ya bikule bese be maneya nyiin.

²⁶ Nalé Israél ase a ye nyiiban aval ane e ne ntilan na: *nkôté bôt a ye so Sioñ. A ye vaa mam me nji bo mam me Zambe e mvô'ô Yakob été.

²⁷ Elate te, nje bia be be bia ye bo, éyoñe ma ye vaa mam *abé map.

²⁸ Mfa'a Mbamba Foé, be ne besiñ amu mia. Ve mfa'a ntoban, be ne minkpwek, amu beésa bap.

²⁹ Nalé amu mimvean a nloone Zambe bi se ngule ya bo momo.

³⁰ E ne été na, e melu mvus, mi nga bo Zambe melo. Ve éyoñe ji, amu melo map, mi nga koban éngôngol.

³¹ Avale te fe be boya melo éyoñe ji, nde nkoon éngôngol ô nga zu e be mia, wo ye fe zu e be be éyoñe jap.

³² Amu Zambe a feteya bôte bese e melo si, asu ya liti bese e mvame jé.

³³ Aka'a édo'o abui afo'o ya fek a ñyemane Zambe bi né. Mintyi'ane mié mi ne teke afasé, a mezene mé me ne ayaé ya yemelan.

³⁴ Ane mintilan mia jô na: Za fo'o a nga yem ôsimesane Nti'

³⁵ Nge na za a mbe mbôndé mefe'e wé'

³⁶ A fe na, za a nga taté ve nye jôm éziñ nde a ye nyoñe ma'an mvus éte'

³⁷ Amu biôme bise bia so be nye, bi too ve amu nye, a bi ne émbié. Duma e bo'o be nye nnôm éto! Amen.