Am 7 - Kalate Zambe Nnomo a Mfefe Mfefé Nkôñelan

Miñyenan ajô nkuan Israél a ye ku

¹ Avale di Nti Nyô a ne Nti a nga liti ma, ô lôô me nga yene nye a kôme nkunda bitandak a koé na bebo bisaé be njô bôt be ndôme mane kôane bidi asu dé, éyoñ ébien mimfefé memvoñ ma taté faa.

² E miñyenane miam été, me nga yene bitandak bi ja'a jôm ése é ne si é too nyôle mekaé bilok. Ane me nga jô na a Nti jamé'é bôte ya ayoñe dôé. Yakob a ye nyiñ aya a too avale tyôtyoé di'

³ Ane Nti a nga tyendé ôsimesan a nga bili, nye na: nalé a ye bo te boban.

⁴ Ñyenan ôfe Nti nyô a ne Nti a nga liti ma: ô lôô, a nga kômesane yaa bôte bé a nduan; nduan éte é nga mane di'i beta yee a ne e si nyôna si nalé fe si ébien:

⁵ ane me nga jô Nti Nyô a ne Nti na: tebe'e! Yakob a ne nguleya nyiñ aya a too avale tyôtyoé di'

⁶ Ane a nga tyendé Ôsimesan, nye na: nalé fe aa ye ke boban.

⁷ Ñyenan ôfe Nti a nga liti ma: ô lôô, a nga tele, a ve'ane mfin ô mbe te mviteban, a a nga bili atyi étyé mo, ntyelane nko, mfa'a ya ve'e ntebane zôsôô ya mimfin mi *nda.

⁸ Ane Nti a nga sili me na: ô lôô jé a Amôs' Me nga yalane na: Atyi étyé, é tii nko, mfa'a ya yemelane tetele ne bip ya mimfin mi *nda. Ane Nti a nga jô me na: ô lôô ma tyelé atyi étyé te ézezañ ayoñe dam Israél: ma ye bo te beta tyendé ôsimesan me bili mfa'a wé éyoñ éfe, na me ve nye *melep.

⁹ Mevôm mese mvoñe bôt Izak ja kañe ma, ma ye tyamban. A mevôm Israél me ne étyi ma ye bo ne sangaññ, a ma ye wosane Yérôbôam a nkpwaté mekôn.

Amôs ba Amatsia mvee mimveane metuna'a

¹⁰ Ane Amatsia, mvee mimveane metuna'a a nga too Bétél, a nga lôme Yérôbôam njô bôt ya Israél tyiñe na: Amôs a kômbô tyam éjôé jôé ayoñ Israél été, nkobô a kobô ô ne ngule ya bôé nlam.

¹¹ Avale di a jô na: Yérôbôam a ye wu a nkpwaté mekôn, Israél a ye ke minkôm si fe é ne ôyab a jale dé.

¹² Ane Amatsia a nga jô Amôs na: ñyene miñyenan, kelek, mate'e a ke e Yuda: nne kele di fembé jôé wé, nne fe kele kulu mejô wé.

¹³ Ve te ke ôsu a bo ésaé *nkulu mejô e Bétél, amu Bétél a ne *nda Zambe njô bôt, a too fe *nda njô bôt ébien.

¹⁴ Ane Amôs a nga yalan Amatsia na: me nji bo *nkulu mejô, me ne môt a nyiñ a mba'alane benyak a a mbéane besikomor,

¹⁵ Nde Nti a nga nyoñe ma me bo'o ésaé biyeme jam: ane a nga jô me na: kele kulu mejô e be bôte bam Israél.

¹⁶ Ajô te éyoñe ji, vô'ôlô'ô ajô Nti: wo jô me na me bo te beta kulu mejô ma wosan Israél, a na me bo te beta kobô nkobô wo wosane *nda bôt Izak.

¹⁷ Ajô e ne na: nyo ngal a ye bo ébamba tison été, bobefam a bobebinga bôé ba ye wu bita, si jôé ja ye kaban mebeñ, womien wo ye wu si bôt be ne te yeme Zambe, a Israél a ye fo'o ke minkôm a kolé'é si jé abo si.