Am 6 - Kalate Zambe Nnomo a Mfefe Mfefé Nkôñelan

Bidim a minkukum a biwôlô bi bôte ya Israél

¹ Bidim a bôt ba nyiñe mvaé e Sioñ, a ba ba nyiñ e nkôle Samari minlem teke tyebe yôp, ba yené biwôlô bi bôt e mise me Israél ase, a bôt ba zu jeñe mvolan e be be.

² (Mia mia jô bôte ya ayoñe denane) na: kelan a yene tison Calné, kelan ôsu a yene beta tison Hamat, a silika'an a yene Gat, tisone Befilisteñ: teke vôme wua ya été a ne ngu a anen ane Yuda a Israél.

³ Mia simesane sulu môse bidim ôyap, ve mam mia bo ma dutu wô bebé.

⁴ Mia mia bômbô a same nyôl akala e ne ébubut, mi ja'a mone ntômba a bone benyak be ne avoñ.

⁵ Mia yia bia a mvet, metyiñ me ye'e tôtan, a amu mia kômbô vu David, nde mia té mimfefé bibômebômé.

⁶ Mia nyu woon e menene bikpwas été a woban mimbon mia dañe nyume mvaé, ve mi ne te tabe éyôé amu minjuk mi ne kui menda me bôte Yôsep.

⁷ Ajô te éyoñe ji, mia ye bo ba ya bôte b'ôsu ba ye ke minkôm: éyoñe mbamba ényiñe minleles a maneya.

⁸ Nti nyô a ne Nti a kaneya ngana e be Emien, e Nkobô Nti, Zambe *minsamba mewosan na: ma vini mebun me Yakob, nalé fe beta biwôlô menda bé, a ma ye kuane tison ése a jôm ése é ne été e be besiñ.

⁹ A nge bôt awôm ba li'i *nda éziñ, ba ye wu.

¹⁰ Eyoñe mbiaé éziñ a ye nyoñe mbime na a di'i wô nduan, a jeñe na a vaa bivese ya été *nda, a ye jô môt a ne aku'u *nda na: ye mia môt éziñ mi ngenan' Môt ate a ye yalane nye na: teke môt. A nyô mbok a ye jô na: Evô! Amu e nji yiane na be loone jôé Nti.

¹¹ Amu ô lôô, Nti a maneya ve mebendé na a ye mane tyame *nda é ne anen, a nyô é ne tyôtyoé a ye veñesan je bifus.

¹² Ye bikabela bi ne mate ako'o yôp' Ye ba fa'a si a benyak' Ve mia mi veñesaneya *zôsôô a bo nsu, a ébuma ya *zôsôô na é bo élok é ne ayô.

¹³ Mia vak a jôm é ne momo. Mia jô na: Kee a ngule jangan nje bi maneya bo ngu'

¹⁴ Amu ajô te, ô lôô, a *nda bôt Israél, nalé Nti, Zambe *minsamba mewosan, a jô na: ma ye telé mia ayoñe bôt e ngame yat; ayoñe te da ye kpwe'ele mia ataté anyiine Hamat a kui ôtôñe araba.