Am 4 - Kalate Zambe Nnomo a Mfefe Mfefé Nkôñelan

Mewosan ma tôñe minkukum mi binga

¹ Vô'ôla'an ajô di, mia bimvumvut bi binga ya Samari; mia mia tibili bingôngole bi bôt, a ko'otô mimbubua, a mia jô benyô beyôm, môt ase na: za'a jôme ya nyu, a e nya'ak.

² Nti nyô a ne Nti a maneya kane ngana e be émien a étyi jé yôbe na: ô lôô, ma zuu *abé mfa'a wônan: ba ye ke ba feneke mia a mintoñ bityé, a môt ase a ye funan ane kos é tii nnop.

³ Ba ye tulane môt ase ya be mia *abé mfine dé ya aka'a e ne nlam, a mia ye wua miabebien Hermon été, Nalé Nti a jô.

Israél a bene kôñelan nlem

⁴ Za'an Bétél a bo'on abé; kelan Gilgal a dañe dañe bo *abé. Za'an betit benan ba yiane tyi'iban metyé mese, nalé fe mengab awômô menan môse milal mise.

⁵ Bo'one mimveane mienane ya mvean akéva a jôme ja vusu fembé, a yôta'an foé mimvean mia ve ane *nlem wo kômbô amu e jam mia nye'e nde le, mia bone b'Israél, Nalé Nti a jô.

⁶ A ma me lômeya mia mfumbale zaé e bitisone bienane bise été: njembane fembé e menda menan mese: v'akôsa bo nalé, mi nji bulan e be ma, Nalé Nti a jô.

⁷ A ma me nga bene noo mia mveñ ngon éla ôsu, te na nkôane bidi ô kpwaan; me nga noo mveñ e tisone nyô, a boo te noo je e tisone fok; mveñ é nga noñ afube di, a afube mveñ é nji noñ e nga mane kôt.

⁸ Bitisone bilaa bi nga ke jeñe mendime ya nyu e be nyô fok: ve évé jap é nji man: akôsa bo nalé, mi nji bulan e be ma, nalé Nti a jô.

⁹ Me nga bibi mia a mieñgele a fos; abui mefube denan, ma me ne ndik wo ve woon, befigié a be olivié benan, me nga bo na zas é mane di bie: ve akôsa bo nalé, mi nji bulane be ma, Nalé Nti a jô.

¹⁰ Me nga lôme bim a jiane biyeme bienan avale me nga bo bôte ya Ejipte. Me nga bo na bisoé bendôman bienan bi mane wu bita a ve bikabela bienan e mo besiñe benan. E minkane mienan été, me nga bo na môé menan me jaé ne lut a ényume bibole mimbim: v'akôsa bo nalé, mi nji bulan a be ma, nalé Nti a jô.

¹¹ Me nga bo mia mi tek, te fe ngule nyô, aval'ane éyoñe Zambe a nga jiane Sodom a Gômor. Ve me nga nyii fe bevo'o ya be mia ane vôme ba vaa ési'i e mbume nduan été: akôsa bo nalé, mi nji bulan e be ma, nalé Nti a jô.

¹² Ajô te, a Israél, nne ma ye bo wo nalé; a amu ma ye bo wo nalé, kômesa'ane tôbane Zambe wôé, a Israél.

¹³ Amu, ô lôô, nyô a nga bo minkô a té évuñulu, a bo môte na *a yem asimesan dé, nyô a tyendé éfufube tyé é bo dibi, a a wulu yôbe ya mevôm me ne mbetan: jôé dé é ne na Nti, Zambe *minsamba mewosan.