Am 2 - Kalate Zambe Nnomo a Mfefe Mfefé Nkôñelan

¹ Avale di Nti a jô na: amu bôte ya Môab be boya *abé da dañ biyoñ bilaa, binyin, ma ye bo te bulan ayaa dame mvus: amu be nga mane di'i bivese bi Njô bôte ya Edom a kôñelan bie fem ba dube menda.

² Ajô te ma ye lôme nduan é wosane Môab, a ja ye bo biwôlô menda ya tisone Kériôt v'asup; a bôte ya Môab ba ye wu ézezañe zô'é bita été, bezimbi be yôta'an a loñe metoñ.

³ A ma ye jiane ntyi'i mejô a vaa nye ézezañe jap; a ma ye wôé bivete bié bise ba be be nsamba, nalé Nti a jô.

⁴ Avale di Nti a jô na: amu Yuda a boya *abé da dañ biyoñe bilaa, binyin, ma ye bo te bulan ayaa dame mvus: amu be maneya ben metiñ me Nti, a be nji ba'ale miñye'elane miam, ve minnal ya bengunemelan mi maneya yale be feñ, avale ane b'ésaa bap be nga du'uban.

⁵ Ajô te ma ye lôme nduan e Yuda a ja ye bo biwôlô menda ya Yérusalém asup.

⁶ Avale di Nti a jô na: amu Israél a boya *abé da dañ biyoñ bilaa, binyin, ma ye bo te bulan ayaa dame mvus: amu ba kuane môt a ne te bijô ane *ôlo, mfa'a ya bi moné, a kuane fe *nzôzoé tañe fia silefase jia.

⁷ A ba nyamete ja'ane mbulu'u ya si, ñwô ô ne e nlô ya bôt ba nyiñ ve a mimvolan; a ba vôône zene ya bôte ba suu fe bebiene si. Monafam ba ésaa wé ba tôban e be monaminga wua, mfa'a ya ndaman jôé dam e n'étyi.

⁸ Ba bômbô e fefel ata'a metuna'a ese e biyé yôp, mbie be nga wôlé ane biban; e menda m'azezambe dap été, ba nyu woon be nga bi, nlumane bôt b'aleman.

⁹ Ve me nga jiane b'Amorééñ ôsu viap, mbe be nga dañ be minté a ngu, me nga ndamane bibuma biap mfa'a ya yôp, a di'i minkane miap mfa'a ya si.

¹⁰ Me nga soo mia si ya Ejipte, a wulu mia e *nkôte si tañe mimbu mewôm menyin na me ve mia si b'Amorééñ é bo énjenan.

¹¹ A me nga toé bekulu mejô ézezañe ya bone benan été: a Benazirieñ ézezañe ya bobefame benan été, ye e nji bo nalé a bone b'Israél' Nalé Nti a jô.

¹² Ve mi nga nyuu Benaziréén woon, a kobô bekulu mejô na be bo te kulu mejô.

¹³ Ô lô ma ye ko'o mia e vôme wônan aval'ane metôa a ko'o dunga fôn e minka si.

¹⁴ Nyô a ne avôle mebo a ye bo te yene vôme ya sobô, a nyô a ne ngu, a ye bo te liti ngule jé, a nyô a ne ngu a ye bo te nyii ényiñe jé.

¹⁵ Nyô a belan *élaé a ye bo te zômbô, a nyô a ne avôl mebo a ye bo te tup, a mbebe ékabela a ye bo te nyii ényiñe jé.

¹⁶ E môt a dañ ayok e bezimbi bese, a ye tup sôsoé môs'ôte, nalé Nti a jô.