Am 1 - Kalate Zambe Nnomo a Mfefe Mfefé Nkôñelan

Nkulan mejô wo wosan Damas, Tir, Edom, Amon, Môab; wu wo wosan Yuda a Israél

¹ Minkulan mejô Amôs, a mbe wua ya bebii mimbam biyem ya Tison Tekôa, mmie mi nga litiban e be nye me wosa'an Israél, melu Ozias a nga too njô bôte ya Yuda a melu Yérôbôam, mone Yôaz, a nga too njô bôte ya Israél, mimbu mibaé ôsu, mfô'ôsane si ô ngenane te boban.

² Ane a nga jô na: *mvam ayo'o Nti ja so Sioñ yôp, a tyiñe jé ja wô'é é so'o Yérusalém. Amu ajô te, mevôm mimbam biyem mia di a ne e beta ôlun été, a abôbône karmel é maneya kôt.

³ Avale di Nti a jô na: amu bôte ya Damas be boya *abé da dañ biyoñ bilaa, binyin, ma ye bo te bulan ayaa dame mvus: amu be nga tibi bôte ya Galad yôp a mintoñ bityé ba tya'a mie bidi:

⁴ ma ye lôme nduan é di'i *nda njô bôt Azaél, a ja ye kôñelane biwôlô menda me njô bôt Ben-Adad asup:

⁵ a ma ye bu'u ôlé étyé wo dipe *mbé aka'a ya Damas a jiane bôt be too mbi'ili Aven, a nyô a bili *ntum éjôé ya *nda njô bôt Eden, a ba ye kee bôte ya Siri minkôm e si ya Kir, nalé Nti a jô.

⁶ Avale di Nti a jô na: amu bôte ya tisone Gaza be boya *abé da dañ biyoñ bilaa, binyin, ma ye bo te bulan ayaa dame mvus: amu be nga kee mingumba minsamba mi bôte minkôm e be bôte ya Edom.

⁷ Ma ye lôme nduan é di'i meka'a ya tisone Gaza, a bo beta biwôlô menda ya été ve asup.

⁸ Ma ye jiane bôte bese ya tison Asdôd, a nyô a bili *ntum éjôé ya tison Askalôn, a wo wom wo ye ke tison Ekroñ e ngame yat, a *mebuka'a ya Befilisteñ (éyoñ ayaa dam e lôteya) ma ye jañ, nalé Nti nyô a ne Nti a jô.

⁹ Avale di Nti a jô na: amu bôte ya tisone Tir be boya *abé da dañ biyoñ bilaa, binyin, ma ye bo te bulan ayaa dame mvus: amu be nga kuane mingumba minsamba minkôm e be bôte ya Edom, teke simesan élat e zañe bobenyañ.

¹⁰ Ajô te ma ye lôme nduan é di'i meka'a ya tisone Tir a bo biwôlô menda ya été v'asup.

¹¹ Avale di Nti a jô na: amu Edom a boya *abé da dañ biyoñ bilaa, binyin, ma ye bo te bulan ayaa dame mvus: amu a nga titan monyañ wé Israél a nkpwaté mekôn, teke éngôngol ébiene nlem; ayaa dé da nyabe bifus melu mese, a a ba'ale de nnôm éto.

¹² Ajô te ma ye lôme nduan é di'i Téman, a nduan éte ja ye bo biwôlô menda ya Bôtsra asub asup.

¹³ Avale di Nti a jô na: amu *bon b'Amon be boya *abé da dañ biyoñ bilaa, binyin, ma ye bo te bulan ayaa dame mvus: amu éyoñ be nga kômbô nene si jap a bita, be nga kui vôme ya sale mebum me binga ya Galad be mbe mebum.

¹⁴ Ajô te ma ye di'i meka'a ya Raba a nduan; nduan éte ja ye di'i biwôlô menda mé a ayaa dam da ye yené môse bita e beta évuñulu été, a môse ôlendé, ézezañe beta ôkôs été.

¹⁵ Njô bôt wop a ye ke minkôm ba be bivete bié nsamba wua, nalé Nti a jô.