Ag 2 - Kalate Zambe Nnomo a Mfefe Mfefé Nkôñelan

Nti a ve belôñe * nda Zambe baa ngule nyôl

¹ E ngone zamgbwale é too melu mewôm mebaé a da, Nti a nga kobô anyu *nkulu mejô Agé na:

² Kobô'ô Zôrôbabél e mone Séaltiél, ngovina ya Yuda, a Yasua e mone Yôsadak, *ntuni nnen, a bôte bevo'o y'ayoñ, a jô be na:

³ za ya be mia a nga yene *nda nyô éyoñ é nga too abeñ y'ôsusua' A éyoñe ji mi lôô je aya' Ye é nji yené ane zesé jôm e mise menan'

⁴ Eyoñe ji a Zôrôbabél, bo'o ngu, nalé Nti a jô. Bo'o ngu a Yasua, e mone Yôsadak, *ntuni nnen, bo'one ngu, a bôte ya si nyôna ése! Nalé Nti a jô, a bo'on ésaé! Amu me ne be mia, nalé Nti a ne Ngul ése a jô.

⁵ Te koone woñ! Mi simesa'ane nkobô me nga kobô mia, éyoñ mi nga kôlô Ejipte, a Nsisime wom ô n'ézezañe jenan;

⁶ amu avale di nde Nti a ne Ngul ése a kobô na: éyoñ éfe jia, ana'ana, ma ye kpwé yôp a si, mañ a si ba telé mebo.

⁷ Ma ye kpwé *meyoñ mese. Biôme bôt be ne kômbô mevale mese bia ye so. A ma ye jalé *nda nyô a étôtok, nalé Nti a ne Ngul ése a jô.

⁸ Argent a n'éñwom, a or a n'éñwom, nalé Nti a ne Ngul ése a jô.

⁹ Etôto'o ya *nda baa nyô, ja ye dañe ji ya *nda y'ôsu, nalé Nti a ne Ngul ése a jô; a e vôme nyô nye ma ye ve *mvo'é, nalé Nti a ne Ngul ése a jô.

Ngaka'a bibotan

¹⁰ Mbu baa Darius a nga jôô, e ngon ébulu é too melu mewôm mebaé a menyin, Nti a nga kobô *nkulu mejô Agé na:

¹¹ Avale di nde Nti a ne Ngul ése a kobô na: sili'i betuni nye'elan ajô te na:

¹² nge môt éziñ a be'e tit é n'étyi aku'u éwomane dé ya si, a aku'u te da nnambe belet, bidi, woon, mbon nge adi afe éziñ, ye jôme te ja ye bo étyi? Betuni be nga yalane na: momo!

¹³ Agé na: nge môt éziñ a ntoo te *mfuban amu nnambane mbim, a nge a nnambe biôme bite bise, ye bia ye bo te *mfuban? Betuni be nga yalane na: bia ye bo te *mfuban.

¹⁴ Eyoñe te Agé a beta kobô a jô na: avale di nde bôte ba be né avale te nde ayoñe di e né asu dam, nalé Nti a jô, nde mimboone mise ya mo map mi né; jôme ba ve ma le é ne mvin.

¹⁵ Ajô te fasan éyoñe ji, mfa'a ya jam da zu boban ataté den a ke ôsu, te na be beté ako'o di avo'o yôp e *nda Zambe Nti,

¹⁶ jé é nga boban' Eyoñe môt a nga ke angune dé na a biete biate bi fône mewôm mebaé, a nga koone ve biat awôm; éyoñ a nga ke e kase na a biete lita woone mewôm metan, a nga koone ve mewôm mebaé.

¹⁷ Me nga mane ndamane bibuma y'ésaé jenan: me nga bo na bidi mia bé bi kôt nge boé e minku'u bilé, me nga bo na meta'a me ku, ve mi nji bulane be ma Nti.

¹⁸ Tuka'a fombane jam da ye boban ataté môse wu. E môse wu, ñwô be maneya bôôé mbôka'a ya *nda Zambe, e ngon ébulu, e too melu mewôm mebaé a menyin, Tuka'a ba'alane jame te.

¹⁹ Nga fôn é maneya mengun' Mindi'i mi woon, befigié, begrenadié a beôlivié be nji wume jôm. V'ataté den ma zu sôôé mia bibotane biam.

Mengaka'a asu Zôrôbabél, nyô Nti a nga top

²⁰ Môse te ôbien, ngon é too melu mewôm mebaé a menyin, Nti a nga kobô Agé éyoñe baa.

²¹ A nga sili nye a kobô Zôrôbabél, ngovina ya Yuda, e mone Sealtiél na: Ma, Nti y'émo, ma ye kpwé yôp a si.

²² Ma zu kpwé bejô bôt a mane ngule ya bijôé ya si; ma ye bo na bevagoñ be ku a bôte ba wulu be, bikabela bia ye wu, a bewulu bikabela ba ye wôan e zañe jap.

²³ Ve *môs ôte ma ye ve wo ésaé, wo Zôrôbabél, ô ne mbo ésaé wom. Wo ye bo ma édima, v'ane sitame jame mamien, amu wo me tobeya señe jam. Jam ma jô nde le, ma, Nti y'émo.