Ag 1 - Kalate Zambe Nnomo a Mfefe Mfefé Nkôñelan

Eyoñe ya beta lôñe * nda Zambe

¹ Mbu baa Darius a nga jôô, valé ngone saman é too alu da, Nti a nga kobô *nkulu mejô Agé. A nga bendé nye na a kate Zôrôbabél, ngovina ya Yuda, e mone Séaltiél a Yasua, *ntuni nnen, e mone Yôsadak na:

² avale di nde Nti a ne ngul ése a jô na: ayoñe di da jô na éyoñ é ngenane te kpwaan, éyoñe *nda Nti ja yiane beta lôñeban.

³ Ane Nti a nga kobô be anyu *nkulu mejô Agé na:

⁴ ye e ne mvaé na mi tabe abeñe menda éyoñe *nda jam é ne ntyaman'

⁵ Nde éyoñe ji Nti a jô na: fasane mboone wônan!

⁶ Mi béya abui, ve mi kôaneya tyôtyoé. Mia di ve teke jaé. Mia nyu, ve teke jaé. Mia jaé ngômesan ve teke wô'ayôñe nyô; mbo ésaé a nyoñe ma'ane mé, ve ma ku e mfek ô ne ntuan.

⁷ Nti a ne Ngul ése a jô na: fasane mboone wônan!

⁸ Betane nkôl, Za'ane bilé a lôñe *nda: ma ye yene je mvaé a ma ye nyoñe duma, nalé Nti a jô.

⁹ Mi nga yange abui bidi, ve tame yenan abime tyôtyoé mi kôaneya. Abime mi nga zuu de menda menan, me maneya mialane de a mvebe wom. Amu jé? Nalé Nti a ne Ngul ése a jô' Amu *nda jam é ne ntyaman, ve môt ase ya be mia ki a bo'o v'ésaé ya *nda jé.

¹⁰ Ajô te yôp da kame mia melo'o mé, a bidi biziñ teke fe faa.

¹¹ Me kuliya mfum e si jenan a minkô, e fôn, e mfefé woon, e mbon, e mfa'a ya jôm ése ja faa si, e bôt a betit a ésaé ése mo menan ma bo.

¹² Ane Zôrôbabél e mone Séaltiél, Yasua *ntuni Nnen, e mone Yôsadak a e bôte bevo'o bese y'ayoñ be nga bo tyiñe Nti, e Zambe wobe mewôk, aval'ane mejô *nkulu mejô Agé a nga kobô me mbe, avale fe ane nlômane Nti, e Zambe wop, a nga lôme nye ô mbe; a bôte bese be nga ko woñ asu Nti.

¹³ Nde Agé, *nlôman Nti, a nga jô bôt aval'ane foé Nti é mbe na: ma me ne be mia, nalé Nti a jô.

¹⁴ Ane Nti a nga vele nsisime Zôrôbabél, e mone Séaltiél, ngovina ya Yuda ôyo, nalé fe nsisime Yasua, e mone Yôsadak, *ntuni nnen a nsisime bôte bevo'o y'ayoñ. Nde be nga zu bo ésaé e *nda Nti a ne Ngul ése, e Zambe wop,

¹⁵ e mbu baa njô bôte Darius a nga jôô, ngone saman é too melu mewôm mebaé a menyin.