ABDIAS 1 - Kalate Zambe Nnomo a Mfefe Mfefé Nkôñelan

Nkulane mejô asu Edom

¹ Nyenane Abdias. Avale di nde Zambe, Nyô a ne Nti, a kobô Edom: bi nyoñeya foé é so'o be Nti, *nlôman ô lômbaneya be *meyoñ: kôla'ane si! Nkôla'ane si, bi tebe Edom e ngame yat, asu ya wosane nye!

² Tame yen, me boya wo tyôtyoé *meyoñ été, o ntoo jôme ékpwe'ele ja dañ.

³ Mebune ya nleme wôé me du'uya wo, wo ô too e mimbane ya meko'o été, wo étaba'a jôé é ne mbetane yôp, a jô womiene na: za a ye sili ma a kui si'

⁴ To'o wo bete yôp ane ndôé, to'o dumba'a dôé e ne nlôñan e vôm ateté e né, ma ye koé wo wé, nalé Nti a jô.

⁵ Nge miñwuwup, besa biôm y'alu, ba zu be wo, tame yen ane wo ye li'i teke jôm! Ye ba ye bo te wube jôm ja volô be' Nge bekolé bibuma bi ndik ba zu be wo, ye ba ye li'i jôm éfe, vengevenge ve bisañeté bibuma'

⁶ Ngo'o Esô, be maneya tyase nye! Be maneya kulane mesoé mé mese!

⁷ Bôt ba be be be nga bo élat be maneya tindi nye a kui nné si. Be nga du'u nye, bemvôé bôé be dañeya wo. Be nga belane bidi biôé asu dôé an'ôlam; ba jô na: fek é ne nye momo!

⁸ Ye sa *môs ôte, nalé Nti a jô, ñwô ma ye vaa Mimfefe'e y'Edom, a vaa ñyeman e nkôl Esô'

⁹ Biwôlô bi bôte biôé, a Téman, bia ye kumetane minlem, nalé ate ba ye vaa môt ase nkôl Edom, amu mewôé me bôt!

¹⁰ Amu *abé ô nga bo monyoñ Yakob, ôson wo ye jaé wo nyô. a ba ye jiane wo nnôm éto,

¹¹ e *môs ô nga tele asu dé e môse bôte befe be nga kee nkane mewosane wé minkôm, éyoñe bikuu bi nga nyiine mimbé mié, a do Yérusalém abia, wo fe ô mbe ane wua ya be be.

¹² Te fombô môse monyoñ, môse bidime wé. Te vak ajô bone be Yuda, môse ba bube mo nduan, te kui anyu ne ndama e môse y'ôlun!

¹³ Te nyiin e bitisone bi bôte bam, e môse ba tôbane mbia jam, a wo fe te fombô bidime biap e môse ba tôbane mbia jam, a te nnambe akume dap e môse ba tôbane mbia jam.

¹⁴ Te tebe ma'ane me zen a wôé bôte ba tup, nge koñe bôt ba nyiñ môse y'ôlun!

¹⁵ Amu môse Nti ô ntoo bebé asu meyoñe mese; aval ô nga bo, nde ba ye bo wo. Ma'ane môé ma ye ku e nlô wôé yôp.

¹⁶ Avale mi nga nyu e nkôle wom ô n'étyi yôp, avale te *meyoñ mese ma ye nyu tek'awo'on, ba ye nyu a min, ba ye bo ane nge be nji tame veebe.

Akuna'a Israél

¹⁷ Ve ba ba nyiñ ba ye bo nkôle Siôn, ba ye bo étyi, a *nda Yakob ja ye beta nyoñe biôme bié.

¹⁸ Nda Yakob ja ye bo nduan a nyô Yôsep ki nkaba'a nduan; ve *nda Esô ja ye bo mimbop nje *nda Yakob a nyô Yôsep ba ye di'i; teke môt éziñ a ye nyiñ e *nda Esô, amu Nti a kobôya.

¹⁹ Ba ya Négéb ba ye nyoñe nkôle Esô, ba ya Séféla ki si Befilisteñ; ba ye nyoñe fé Efrayim a fé ya Samari; Bényamin a ye nyoñe Galad

²⁰ bekee minkôm, nkane mewosane bone b'Israél, ba ye nyoñe si Bekananééñ a kui Sarépta, a bekee minkôme ya Yérusalém be ne Séfarad ba ye nyoñe bitisone ya Négéb.

²¹ Bekôté bôt ba ye bete nkôle Siôn, asu ya tyi'i nkôl Esô mejô; a njôan wo ye bo wu Nti.