3 Jn 1 - Kalate Zambe Nnomo a Mfefe Mfefé Nkôñelan

¹ Ma, *mvendé, ma tili nyô ma dañe nye'e éfufup ya benya mejôô été.

² A mba mvôé, ma nyamete na, ô tabe *mvo'é mezene mese a na, nyôle jôé é bo *mvo'é avale da ane nsisime wôé ô né.

³ Yaa, me nga wô'ô avale abui a, e bobejañ be nga kui va, ba kañete ane éfufup ya benya mejôô é nga faé ényiñe jôé été. Wo wulu éfufup ya e benyaa mejôô été.

⁴ E beta ava'a wom a ne éyoñ ma wô'ô na e bone bam ba wulu éfufup ya benya mejôô été.

⁵ A édima mvôé, wo bo aval ane mbunane wôé ô né, mfa'a ya nju'u wo nyoñ asu bobenyañ, ja'ane mfa'a beyeñ.

⁶ Be nga kañete mboone mvame wôé asu keké. Wo ye dañe bo mvaé éyoñ wo volô dulu nlômane dap, aval ane nkômbane Zambe ô né.

⁷ A amu jôé dé, be nga téé dulu teke nyoñe jôm e be bikuu.

⁸ Avale te bia fe bia yiane volô bôte bete, a liti na, bi ne benyoñe ngap ya benya mejôô.

⁹ Me nga tili keké mejô m'éziñ, ve Diôtréfe, e nyô *a nye'e a too évet a nji nyoñe bia.

¹⁰ A na, éyoñ ma ye zu, ma ye kulane mbia *minkobô mise a kobô bia. A saa ve nalé étam, ve émien a bene nyoñe bobenyañ a ba ba kômbô be nyoñ. A dipe be *zen, a titane be e keké.

¹¹ A édima mvôé, te vu mboon *abé. E nyô a bo mvaé a ne nyô Zambe. E nyô a bo *abé, a nji yene Zambe.

¹² Mfa'a Démitrius, bôt ba ve mbamba nkañete mfa'a wé. Bebela émien a liti nalé. Ja'ane bia fe, bi ne bengaa. A wo yeme na, nkañete wongan ô ne bebela.

¹³ Me bili mam abui ya tili wo, ve me nji kômbô tili a nkôs a tiñeti:

¹⁴ amu me too ndi na ma ye yene wo ana'ana, a bia ye laan bi lôane mesu.

¹⁵ Mvo'é é bo'ok a wo! Bemvôé ba batane wo. Bata'ane fe ma bemvôé, môt ase wuawua.