2 Tim 4 - Kalate Zambe Nnomo a Mfefe Mfefé Nkôñelan

Kate Mbamba foé

¹ Ma bendé wo a jôé Zambe, di Krist Yésus a ye zu tyi'i bevevee a miñwuan mejô, amu ñyenane wé a éjôé jé na:

² kobô'ô ajô Zambe, va'a ngu, éyoñ ja yian, a ji é ne te yian! Komeka'an a yaa bôt, lebek, éyoñ ése e njiban été, a e nkômbane ya ye'ele été.

³ Amu éyoñ ja ye zu, e too bebela na, bôt ba ye bo te jibi mbamba miñye'elan. Ve aval ane minkômbane miap mibien mi né, a ngômelane ya melo map, ba ye bômane bebien a jama beye'ele.

⁴ Ba ye vaa melo map e ñwô'ane benya mejôô, a vô'ôlô minkana.

⁵ Ve wo, jô'ô womien e mfa'a mame mese. Jibi'i mintaé, bo'o ésaé nkatefoé, jalé'é ésaé jôé.

Eyoñe nkôlane Paul

⁶ Mfa'a wom me ne mbon ba sôé étyi'a nyô. Eyoñ akôlô dam é kpwaneya.

⁷ Me maneya wosan abeñe mewosan. Me sondôya mmatane mbil. Me ba'aleya mbunan.

⁸ Ataté éyoñe ji, ékate *zôsôô é ne me mba'alan, nje Nti, *zôsôô Ntyi'i mejô a ye ve ma *môs ôte. A saa ve ma étam, nalé fe ba bese ba ye nye'e e nsoone wé.

Mebendé ma su'ulan

⁹ Jeñe *zen ése ya ji'a zu koone ma.

¹⁰ Amu Démas a li'iya ma, amu nye'ane mame ya émo ji. A keya Tésalônik, Krésens ke e Galati, Tite ke Dalmati.

¹¹ Luk étam nye bia nye bi né. Nyoñe Mark nsamba wôé éyoñe wo zu, amu a ne ma mfi ésaé été.

¹² Me lômeya Tisik Eféze.

¹³ Alô'ô me nga li'i Trôas e ndaa Karpôs, ô za'a de éyoñe wo zu, a bekalate, a dañedañ ba be ne mvulekan.

¹⁴ Alékzandre, nlui melui, a nga bo ma *abé abui. Nti a ye ya'ane nye aval ane mimboone mié mi né.

¹⁵ Wo fe tabe'e nye ntyel, amu a wosane mejô mangan mbia ñwosan.

¹⁶ Teke môt a nga too ma fefe, éyoñ ôsu me nga kat ajô dam, bese be nga li'i ma. Ve da, dili e bo'o te lañebane be ane jam.

¹⁷ Ve Nti a nga volô ma. A nga ve ma ngu, ajô te Mbamba Foé a ye kateban, a wô'ôban e be bikule bise aa ma. A me nga kôtéban anyu ngbwengbwem.

¹⁸ Nti a ye kôté ma mfa'a mbia mboon ase a nyii ma asu éjôé jé ya yôp. Duma e bo'o be nye nnôm éto a nnôm éto. Amen!

Mebatan ma su'ulan

¹⁹ Bata'ane ma Priska a Akilas, nalé fe *nda bôte Onésifor.

²⁰ Eraste a nga li'i Korént. Me nga li'i Trôfime a Konôk e Milé.

²¹ Jeñe *zen ése ya zu éyoñ ôyôn ô ngenane te taté. Ebule, Pudéns, Lin, Klôdia a bobejañ bese ba batane wo.

²² Nti a tabe'e a Nsisime wôé. Mvam é bo'o be mia bese.