2 Tim 3 - Kalate Zambe Nnomo a Mfefe Mfefé Nkôñelan

Minju'u ya biyoñ bia su'ulan

¹ Tuka'a yeme jame dina na, melu ma su'ulan, biyoñ bi ne ayaé bia ye bo.

² E ne na, bôt ba ye bo mimfôfom, benye'e moné, ngunguan a mebun, bekobô Zambe ébiasé, a bekange bebiaé bap, bikalak, te semé jôm é ne étyi,

³ ba ye bo teke minleme mebum, njet, bibôta, be te jôô bebien, évô, besiñe mam me ne mvaé.

⁴ Bekoñe bôt, mbia minlem, ndim amu mebun, benye'e mimvôman a lôte Zambe.

⁵ Ba ye bi mbunan ane ébuta'a ékpwaé, ve be too ba ba sôane ngule Zambe. Sa'ale'e fe avale bôte te!

⁶ Bevo'o ya be be ba nyiin menda menda a dutu abibinga e ne njalan a mam *abé e mevote map, e nde ete e ntoo alo ya minkômbane mevale mese.

⁷ Ba jeñe zene ya yé'é éyoñ ése, ve tee ngule ya kui vôme ya yeme benya mejôô.

⁸ Aval ane Yanés a Yambrés be nga tebe Môze e ngame yat, avale te fe bôte bete ba tebe benya mejôô e ngame yat; be ne bôt be bili *nsisim ézezam a mbunan ô ne atek.

⁹ Ve ba ye bo te ke ôyab ôsu amu bôte bese ba ye yemelane akute, mboone dap, aval ane e nga yené be Yanés a Yambrés.

Melep mfa'a Timôté

¹⁰ Ve wo, ô nga ji'a tôñe ma e nye'elane wom, e ntabane wom, e mefe'e mam, e mbunan, e njiban, e nye'an, e mban,

¹¹ e bikpwe'ele a e mintaé me nga tôbane bie Antiôche, Ikôn a Listre. Avale bikpwe'ele me nga tôbane bie. A Nti a nga vaa ma bie bise été.

¹² Amu ba bese ba kômbô nyiñ e mbunane Krist Yésus été, ba ye wu ékpwe'ele:

¹³ ve mfa'a mbia be bôt a belaa minsos, ba ye yaé *abé été, a du'u bôt befe a bebien.

¹⁴ Ve wo, tebe'e ne bip e mam ô nga yé'é a kañese ane benya mejôô été. Wo yeme be beza ô nga yé'é me.

¹⁵ Aso ébôbo'o abialé dôé, wo yeme Mimfufube Mintilan; mi bili ngule ya ve wo fe'e ja ke kui nyian a zene ya mbunan ô ne be Krist Yésus.

¹⁶ Ntilan ôse ô ne wu wo so e be Zambe, a mvolan asu ya ye'ele, asu ya komekan, asu ya sôane bôte *zôsôô, asu ya ya'ale e *zôsôô été,

¹⁷ nalé môta Zambe a ye jaléban a bo nkôman asu mbamba mboon ase.