2 Tim 2 - Kalate Zambe Nnomo a Mfefe Mfefé Nkôñelan

Nyoñe ngabe jôé ya mintaé

¹ Ajô te wo, a mone wom, bo'o ngul e *mvam é ne bia be Krist Yésus été.

² Nye'elan ô nga nyoñe be ma e mise bengaa abui, va'a wô bôt be ne ba ya tabe bee ndi, mbe bebien ba ye bo ngul ya beta ye'ele wô bôte befe.

³ Nyoñe ngabe jôé ya mintaé aval ane mbamba mone bezimbi Krist Yésus.

⁴ Teke môt, éyoñ a tyi'i na a nyiine bezimbi, a beta tyelé nleme yôb a ényiñe zesé môt nge a kômbô ve nyô a nga nyoñe nye nka'a mvus.

⁵ Avale te fe nsôngane bivôé: teke mbo bivôé a nyoñ ékate duma, vengevenge ve a nga sôngan a semé'é metiñe bivôé.

⁶ Mbé mefup a wu njuk, nye a yiane taté nyoñe ngabe bibuma jé.

⁷ Wô'ô jam ma jô. Akôsa bo nalé, Nti a ye volô wo na ô wô'ô mam mete mese.

Simesa'ane Yésus ñwômane miñwuan

⁸ Simesa'an Yésus Krist ya mvoñe bôt David ñwômane miñwuan, aval ane Mbamba Foé ma kañete a jô,

⁹ a nye ate ma wuu nye mintaé a ka'abane mengata'a aval ane nge me ne mbia môt. Akôsa bo nalé, Mbamba Foé Zambe nye a nji bo nka'ane ngata'a!

¹⁰ Ajô te ma jibi mame mese, amu mintobane mi bôt, nalé be fe ba ye bi nyian ô nee be Krist Yésus a étôto'o ya nnôm éto.

¹¹ Njôane wu ô ne wu ya buni: nge bia wu a nye, bia ye nyiñ a nye.

¹² nge bia wu mintaé a nye, bia ye jôô a nye. Nge bia dimi nye nye a ye dimi bia.

¹³ Nge bia bo te bo ba a too be ndi, ve nye a ye bo étabe ndi jangan, amu a se ngule ya dimi émien.

Nkatane benya mejôô e * zôsôô été

¹⁴ Bo'o be na be simesane mame mete mese, a kañete asu Zambe na, be sa'ale meluman, bifia bi nji volô jôm, bia jaa ve ba ba vô'ôlô bie.

¹⁵ Ô va'a ngule ya yené asu Zambe, ane nyô a ve'elebaneya, ane mbo ésaé a ne te wô'ô ôson, nyô a ye'ele bôt benya mejôô *zôsôô.

¹⁶ O sa'ale'e mbia *minkobô. E ba ba ve bebien été, ba ye yaé a ke ôsu *abé été.

¹⁷ Bifia biap, bi ne ane fôl ja nen. Avale te Himené a Filétôs be né.

¹⁸ Be nga kee nya nye'elane e fefe a ve'e fe'e na ñwôman miñwuan ô maneya boban. Nalé ate ba kpwéé mbunane bôt abui.

Mbôka'a Zambe a nga bôôé

¹⁹ Akôsa bo, ngule mbôka'a Zambe a nga bôôé é ne. O bili *sitam nje é ne éfia jina na: Nti a yeme ba be ne émbé, a na: nyô ase a loone jôé Nti, a kele *abé ôyap.

²⁰ E beta *nda été, saa ve meviek me or mme me né étam, nge ma me argent; e ma bilé a ma m'étek me ne fe été. Mevok me ne asu mebelane ma yiane duma, e ma mevok asu mebelan me ne si.

²¹ Nyô a bo émien *mfuban, a ye bo vie'e mebelane ma yiane duma, étyi a mfi e be masa, wu wo yiane mbamba mboon ase.

Mbo ésaé Nti

²² Mate'e mbia minkômbane bisoé, jeñe *zôsôô, mbunan, nye'an a *mvo'é mia be ba bese ba loone jôé Nti be too mfubane minlem.

²³ Ve zesé bisô ya tee fek, sa'ale'e bie. Amu wo yeme na bia dutu mejô.

²⁴ Ve mbo ésaé Nti a nji yiane bo môta mejô, ve mbamba môt e be bôte bese, ngule ya ye'ele, a njibane nsela'an asimesan.

²⁵ A yiane ye'ele ba ba sôane nye a nje'ebane *nlem. Za *a yem nge Zambe a ne volô be na be kôñelan a yeme benyaa mejôô,

²⁶ be bulan e be bebien a kôlô mevote me Satan, nyô a nga bili be minkôm a belo ya nkômbane wé'