2 Tim 1 - Kalate Zambe Nnomo a Mfefe Mfefé Nkôñelan

Mebatan

¹ Ma, Paul, *nlôman Krist Yésus, amu nkômbane Zambe, aval ane ngaka'a ényiñ é ne e Krist Yésus été é né.

² Ma tili mone wom ma kôme nye'e Timôté. Mvam, nkoon éngôngo a *mvo'é, bi bo'o be wo, bi so'o be Zambe Esaa a e be Krist Yésus, Nti wongan.

Mvean akéva

³ Me ne njalan a ñyeman ma yeme mvaé Zambe a boya ma, nyô ma bo ésaé mvuse bemvamba, a mone môte ya *nlem wom a too *mfuban, éyoñ ése ma simesane wo alu baa *môs. Ma tote jôé dôé meye'elan mam été.

⁴ Eyoñ ma beta simesane mili'i môé, ma dañe kômbô beta yene wo, nde ma ye jaé ne lut a mevak.

⁵ Ma simesane mbunane wôé ô ne tee medu'an. Mbunan ô nga taté tabe e be émvame jôé Lois a e be nyua Enis, ñwô te, ma tu'a buni nalé na, ô too be wo.

⁶ Ajô te, ma bo wo ô simesane wômôlô mveane Zambe ô nee be wo, ataté éyoñ me nga beté wo mo.

⁷ Amu Zambe a nji ve bia nsisime woñ, ve Nsisim ô ne ngu, nye'an a wu njôane *nlem.

⁸ Ajô te te wô'ô ôsone ya bo ngaa Nti wongan, a te wô'ô ma ôson, ma mbôk amu nye. Ve nyoñe ngabe mintaé jam amu Mbamba Foé, ô buni'i e ngule Zambe,

⁹ nyô a nga nyii bia a loone bia mfufube nloon, saa amu mimboone mi mam miangan, ve amu nkômbane wé émien a mvame jé, e *mvam é nga vebane be bia aso biyoñe ya nnôm éto e be Krist Yésus,

¹⁰ é maneya yené éyoñe ji a nsoone nyii wongan Krist Yésus. E nye a nga tyam awu a bo na ényiñ a te wu bi faé amu Mbamba Foé,

¹¹ nye ate ma, me nga teléban nkatefoé, *nlôman a nye'ele.

¹² Amu ajô te ma jibi mintaé mite. Ve me nji wô'ô ôson, amu ma yeme nyô me nga buni. A me too ndi nleme na, a bili ngule ya ba'ale ngabe mbunan é nga vebane be ma akekui *môs ôte.

¹³ Bii mimfufube mejô ô nga wô'ô be ma, ane mbôka'a, e mbunan a e nye'an été, mbie bite bi nee be Krist Yésus.

¹⁴ Ba'ale'e mbamba ngabe mbunan ngule Mfufube Nsisim a too be bia.

¹⁵ Wo yem na, e ba bese ya Azi be nga li'i ma, aval ane Figél a Hermôgén.

¹⁶ Nti a sô'ô mvame jé e *nda bôt Onésifor, amu a nga ve ma ngule *nlem biyoñ abui, a a nji wô'ô mengata'a mam ôson.

¹⁷ Ve nné ane a nga kui Rôm, a nga viane jeñe ma a mevak a yene fe ma.

¹⁸ Nti a volô'ô nye na, a yene nkoon éngôngol e be Nti *môs ôte. A bisaé bise a nga bo ma Eféze, wo étam wo yeme bie nya ñyemane.