2 Tes 3 - Kalate Zambe Nnomo a Mfefe Mfefé Nkôñelan

Melep ajô meye'elan a ésaé

¹ A bobejañ, ye'ela'an ajô dangan, nalé ate ajô Nti e ne ngule ya ji'a mialan a wum aval ane e né e be mia,

² nde bia ye kôtéban e be ba be ne ézezam a mbia be bôt; amu bese be nji bi mbunan.

³ Nti a ne nyô ya buni: A ye yemete mia a ba'ale mia mfa'a mbia môt.

⁴ Mfa'a wônan, bi too ndi e be Nti na, e jam bia bendé mia, mia bo de a mia ye ke ôsu a bo de.

⁵ Nti a wulu'u minleme mienan e nye'ane Zambe été a e mbane njibane be Krist été.

⁶ Bia bendé mia a jôé Nti Yésus Krist a bobejañ na: Mi tyetebe e mojañ ase a nyiñ e jo'ojo'o ényiñ été, saa ane fulu mi nga nyoñe be bia é né.

⁷ Amu miabebien mia yem ane mia yiane vu bia; amu bi nji nyiñ e jo'ojo'o été e zañe jenan.

⁸ Bi nji di bidi bi môt éziñ akap; ve e mboon ésaé été a e nju'u été, bi nga saé alu ba môse na bi bo te bo mbe'e be môt éziñe ya be mia.

⁹ Akôsa bo na bi nga yiane sili, ve bi nga kômbô bo, mfa'a wônan, éve'ela mia yiane vu.

¹⁰ Yaa, éyoñ bi nga too mia bebé, bi nga ve mia abendé di na: Nge môt éziñ a nji kômbô bo ésaé, a bo'o fe te di.

¹¹ Amu bia wô'ôtane na bôt b'éziñ ba nyiñ jo'ojo'o ényiñ e be mia, avale di na éyoñe ba yiane saé, ba viane bo biduñ.

¹² Bia bendé bôte bete e be Nti Yésus Krist, a lebe be na: Be bo'o ésaé évôvoé été, a be ja'a bidi bebien ba ye bi.

¹³ Ve mia, a bobejañ, te mia tek a mboone mvaé.

¹⁴ Nge môt éziñ a bo te ve mejô ya kalate nyô mewôk, lita'ane jam a bo, a bo te fulane mam a nye, nde a ye wô'ô ôson.

¹⁵ Ve te yenane nye ane nsiñ, ve ve nye bijô ane monyañ.

Mbamba njôan a mebatan

¹⁶ Nti ya *mvo'é émien a va'a mia *mvo'é éyoñ ése, a mezene mese. Nti a tabe'e be mia bese.

¹⁷ Ma Paul, ma batane mia a wo wom. Avale di nde ma sane kalate ase: e ntilane wom ñwô le.

¹⁸ E mvame Nti Yésus Krist é tabe'e e be mia bese.