2 Tes 2 - Kalate Zambe Nnomo a Mfefe Mfefé Nkôñelan

E mam ma fombô nsoone Krist

¹ Mfa'a nsoone Nti wongan Yésus Krist, a nsula'ane wongan e vôm a too, bia sili mia jame da a bobejañ,

² na mi nji yiane ji'a dañe jañele fek, nge ko woñ a nkulane mejô éziñ, nge njôan éziñ, nge kalate éziñ ba liti mia, aval ane nge mame mete ma so e be bia, a mame mete me ne bo mia mi buni na, e môse Nti ô soya.

³ Môt éziñ a bo'o te du'u mia a *zen éziñ. E jam ôsu da ye taté boban e ne na: Nli'ane mbunan, a nyô a wosane wô a ye yené, mone ya njañan,

⁴ nyô a tebe a wosane jôm ése ba loone Zambe, nge ji ba kañ, a kui vôme ya tabe, émien, e *nda Zambe, a yôtane na a ne Zambe.

⁵ Ye mia vuane na, me mbe me kobô'ô mia jame te éyoñe me nga to mia bebé'

⁶ A éyoñe ji, mia yem e jôm ja telé nye, ane a ye yené ve éyoñe jé émien.

⁷ Amu *ndimba jam y'abé é nga bo ésaé; da sili éyoñe ji ve na be telé nyô a bi je e fefe.

⁸ Eyoñe te ñhe nsoone mbo *abé wo ye yené nye Nti Yésus Krist a ye tyam a évuñulu ya anyu dé a jiane nye a éfufube ya nsoone wé.

⁹ Nsoone mbo *abé wo ye yené a ngule *satan, a ngule mimboon mevale mese: bitua bi mam, mesimba medu'an.

¹⁰ A mindutan mi ékotekot mevale mese e be ba ba jañ, amu be nji nyoñe nye'ane benya mejôô ñwô ô nga yiane nyii be.

¹¹ Ajô te Zambe a lôme be ngule ja bo na be jañe fé a nje ja ye bo be na be buni minsos,

¹² nde e ba bese be nga bo te buni benya mejô ve yen ékotekot mvaé, ba ye tyi'ibane mejô.

Nyemane ngul e mbunan été

¹³ Ve mfa'a wongan bia yiane ke ôsu a ve Zambe akéva amu ajô denan, a bobejañ Nti a dañe nye'e, amu Zambe a nga tobe mia aso atata'a asu ya nyiiban a Nsisim wo fubu, a mbunane benya mejôô.

¹⁴ Jame te nde a nga loone mia a nkatane Mbamba Foé wongan na mi bi étôto'o Nti wongan Yésus Krist.

¹⁵ Nde a bobejañ, teba'ane ngu a ba'ale miñye'elane ya kôa bi nga ye'ele mia a menyu mangan nge bekalate.

¹⁶ Nde Nti wongan, Yésus Krist émien, a Zambe Esaa wongan, nyô a nga nye'e bia, a ve bia amu mvame jé, mvolane minlem ô ne nnôm éto, a mbamba ndi *nlem,

¹⁷ a volô'ô mia minlem, a yemete'e e mia e mame mese mia bo été a mam mese mia jô été asu mboone mvaé.