2 Tes 1 - Kalate Zambe Nnomo a Mfefe Mfefé Nkôñelan

Ntili kalate a mebatan

¹ Ma, Paul, bia Silvain a Timôté bi too, ma tili keké *bebuni ya Tésalônik é ne e be Zambe Esaa wongan a e be Nti Yésus Krist.

² Mvam é bo'o be mia a *mvo'é, bi so'o be Zambe Esaa a be Nti Yésus Krist.

Meyaé e mbunan été akôsa bo étibela'a

³ Bia yiane ve Zambe akéva éyoñ ése ajô denan a bobejañ, a e ne fo'o *zôsôô nalé amu mbunane wônan wo liti abui meyaé nye'ane mi bili e zañe jenan, wua a nyô mbok, a wo yaé e be môt ase ya e be mia.

⁴ Avale ya na mi ntoo e jam bia nguane de e bekeké be Zambe été, amu mbane wônan a mbunane wônan e bitibela'a a *meve'ele mia jibi été.

⁵ Bitibela'a bite a *meve'ele mete bi ne ndeme zôsôa ntyi'ane mejô Zambe; bia sôñe na mi bo e ba ba yian éjôé Zambe nje mia tôbane je minjuk.

⁶ Yaa, e ne *zôsôô mfa'a Zambe na a bulane melunga e be ba tooé mia e melunga été;

⁷ a na a ve mia awo'on a bia, e mia ba tibili éyoñe Nti Yésus a ye yené, nyô a ye so yôp baa mingungule beéngele

⁸ e nduan ja yôñ été, e mfa'a ya bo akuna'a e be ba be nji yeme Zambe a ba be nji ve Mbamba Foé Nti Yésus mewôk.

⁹ Melebe map ma ye bo njañane ya nnôm éto, ôyab a asu Nti a éfufube ya éto ntômba jé,

¹⁰ éyoñ a ye so *môs ôte, mfa'a ya nyoñe duma e be mimfufube mié, a ésemé e be ba bese be nga buni nye: ve mia mi nga buni nkañetane foé wongan.

¹¹ Amu ajô te bia ye'elan ajô denan biyoñe bise, ane Zambe wongan a ne yene mia ane ba ba yiane nloon a nga loone mia. A na, a e ngule jé, a ve mia ngule ya bo mame mese me ne mvaé a bo fe mbunane wônane na ô fô'ôsan.

¹² Ajô te jôé Nti wongan Yésus da ye wum e be mia, a mia e be nye, aval ane mvame Zambe wongan a Nti Yésus Krist é né.