2 Pi 3 - Kalate Zambe Nnomo a Mfefe Mfefé Nkôñelan

Môse Nti ô nji langan

¹ A bidima bemvôé biam, e kalate baa ñhe ma tili mia nyô. E bebaane été, aval ane ma ba'alane mia mam, ma kômbô vumelan asimesan e ne *mvo'é e minsisime mienan été.

² Ma kômbô na mi simesane mejô mimfufube bekulu mejô mi nga jô melu mvus, mebendé me Nti a Nyii bôt mme minlômane mienan mi nga kalane mia.

³ Yeman ôsusua na, e melu ma su'ulan, e bôt ba ye nyiñ ane minkômbane miabe mibien mi né ba ye yené. Ba ye woé mia

⁴ a jô na: Ye a nji li'i ngaka'a na a zu nga? Nde ñhe, a ne vé? Beésa bangan be maneya wu, ve mam mese me ngenan avale da ane éyoñe ntéane biôm!

⁵ Ba vañe vuane jame dina na: Zambe a nga té yôp a si a mejô y'anyu den a ntoo ayab éyoñ. Si é nga kandane mendim a é nga kômban a mendim,

⁶ a mendime fe, ma ya beta ndôn, e mme me nga tyame nnôme si.

⁷ Mfa'a yôp a si y'éyoñe ji, nkobô Zambe wuwua ñwô wo ba'ale bie asu nduan ja ye tyame bie. Bi ne mba'alan asu môse ntyi'ane mejô a njañane bebo *abé.

⁸ Ve jame da e ne, nde mi nji yiane vuan, a bidima bemvôé biam, nalé a ne na: Mfa'a Nti, môse wua ô ne ane toyini mimbu a toyini mimbu ane môse wua.

⁹ Nti a nji langan asu ya tôé ngaka'a jé, avale bevo'o ba simesan. Ve a ne ôjibi mfa'a wônan, amu a nji kômbô na za nge za a jañ; ve a kômbô na bese be bi éyoñe ya lume *abé mvus.

¹⁰ Ve môse Nti wo ye so ane ñwuwup. Yôp da ye jañe *môs ôte a beta éduñ a ne ékowoñ, ateté ya yôp da ye tyamban a nduan, si a biôme bise bi ne été ja ye bo momo.

¹¹ Mbôlô biôme bise bia ye jañ avale te, yemane ñhe e jam mia yiane bo! Ntabane wônan wo yiane bo étyi ô be'e nlatan a Zambe ane *sitam.

¹² Mia yiane yange môse Zambe mi va'a ngule jenan ése asu ya na ô ji'a so. Môs ôte wo ye bo wu yôp da ye tyamban a nduan e môse ateté ya yôp da ye nyemé a ayôñe minkaba'a mi nduan.

¹³ Ve Zambe a nga ve ngaka'a mfefé yôp a mfefé si, e vôme *zôsôô a ye tabe, e jame bia yange e nde le.

¹⁴ Ajô te, a bidima bemvôé biam, nté bia yange *môs ôte, va'ane ngule jenan ése na mi bo *mfuban a teke jame ya komekane mia e mise me Zambe, a na mia be nye mi tabe *mvo'é.

¹⁵ Wô'ane jame dina na, ôjibi Nti wongan wo ve mia afôla ya nyiiban, aval édima mojañe wongan Paul a nga tili mia a fe'e Zambe a nga ve nye.

¹⁶ Jam a nga tili e bekalate bé bese été nde le, e vôm a kobô ajô te. Mefôla m'éziñ me ne été me too ayaé ya wôk; minsusuk a ba be ne tee ngum été, ba vôôn atinane y'été, avale fe ba bo mengabe befe ya Mintilan. Ajô te ñhe ba dutu njañan wobe bebien.

¹⁷ Ve mfa'a wônan, a bidima bemvôé biam, mi bili ayemé éyoñe ji. Taba'ane ñhe ntye, te kañesane na bikobe bi bôt bi ne te ko jam éziñe woñ bi tuli mia fé, a te ve'elane dimili e ngul ébé mi bili.

¹⁸ Ve kelan ôsu a yaé e *mvam a ñyeman Nti wongan a Nyii wongan Yésus Krist. Duma e bo'o be nye ataté éyoñe ji a kui nnôm éto! Amen.