2 Pi 2 - Kalate Zambe Nnomo a Mfefe Mfefé Nkôñelan

Bekulu mejô be ne minsos

¹ Bekulu mejô be ne minsos be nga too fe e be bôt. Avale te fe e zañe jenan, beye'ele be ne medu'an ba ye zu a nyiñeli mbia miñye'elan ôte'etek e be mia, a kui vôme ya kate nyô a nga kôté be, a *zen éte, ba ye dutu njañan e be bebien atemetem.

² Abui bôt da ye tôñe be e bijabô biab été: amu be, zene benya mejôô ja ye biaséban;

³ a ôzañ akume wob été, ba ye diane mia a *minkobô medu'an; mfa'a wop, aso ayap, ntyi'an ajô wop ô nji bômbô zezé nalé fe njañane wop teke ke ôyo.

⁴ Amu Zambe a nji jamé beéngele be nga kop. Ve a nga wua be étôtôlan e vôm a ba'ale be asu nka'ane bengôkop e dibi été môse ntyi'ane mejô.

⁵ Avale te fe a nji nyii si ya melu kôa, ve a nga ba'ale, melu ndôn é nga jine mbia be bôt, Noé, wua ya bôte muam be nga nyiñ, nyô a nga too mben.

⁶ Zambe a nga jiane minlame ya Sodom a Gomore mi bo ve asub asup, éve'ela asu mbia be bôte ya melu ôsu.

⁷ Ane a nga nyii Lot, zôsôa môt, nye a nga to mbametan ézezañe bewôé bôt be ne bijabô bete.

⁸ Zôsôa môt ate, nye a mbe a nyiñik ézezañe jap, a mbe a yenek a wôk e mam mese be mbe be bo'ok; *môs ane *môs, amu mimboone miap mi mbe ékolé ôbak, nsisime wé ya zôsôa môt ô nga tôbane njuk.

⁹ Nalé a ne na, Nti a ne nguleya vaa bezôsôô be bôte bé *meve'ele été, a ba'ale bikotekote bi bôt ngume vôm, asu ya ve be *melep e môse ntyi'ane mejô.

¹⁰ Osusua, a ye lebe ba ba tôñe mbia minkômban ya minsône miap, a biasé éjôé Zambe. E ba ba dañe buni bebien, ébiasé e nkobô, be ne teke semé bitôto'o bitétéa ya yôp, ve taa bie.

¹¹ Ve e to na, beéngele be ba dañe bitétéa bite e ngu a éwôlô, be be nji ve bie mekua ma liti ébiasé e mise me Nti.

¹² Ve bôte bete, be ne teke fek, ane betite ya fé mbe be ne mbialane na ba ye bili melam a wôéban; ba ta jôm be nji tu'a yem. Ba ye wôéban ane betite ya fé.

¹³ Ba ye nyoñe ma'ane ya ékotekote mboone jap. Ba yene mvaé na, be jalé mbia minkômbane miap a *môs. Ntabane wop ézezañe bôt, ô ne ôson a ékolé ôbak, éyoñ ba tabe bisulan bi ndiane bienan be wô'ô mvaé ya medu'ane map.

¹⁴ Mise njalan a *mejian, be ne teke jaé mboon *abé, be dutu'u minsisim mia yeñelan, be beté'é ôdo'é y'ôzañ akum, be ne bone biyo'é.

¹⁵ Eyoñe be li'iya e *zen é ne *zôsôô be nga fu'u fé a ntôñane zene Balam e mone Béor, nye a nga ku *mebôbela'a été amu nkômbane ya nyoñ ékotekote ma'an.

¹⁶ Ane a nga nyoñ minkomekan amu melo mé. Nalé mvumvu'u mone éjakas ô nga kobô ane tyiñe môt a telé akute mboone *nkulu mejô.

¹⁷ Bôte bete be ne aval ane menjeñ me ne mvelan, a aval ane minkut mia tindiban a ôkôs, Zambe a ba'aleya be éto, e vôm a ne édo'o dibi.

¹⁸ Ba kobô bivuvu'u *minkobô mi too tee éfia ja wô'é. Ba belane minkômbane miap mia dañ ôson asu ya bi e ba be ndôme tundan e nsamba bôt wo nyiñ ékotekot e melam mab été.

¹⁹ Ba ka'a be éto beti, ve bebien be too belo ya bibole bi mam. Amu môt a ne *ôlo ya jôme ja jôô nye.

²⁰ Amu nge ba be kôlô ya e mvine mame ya *si nyô été amu ñyemane ya yeme Nti a Nyii wongan Yésus Krist, ba beta ku a kañese mam mete, ényiñe jap ja su'ulane bo angôndô ya *abé, a lôt aval é nga too.

²¹ E nga ye bo mvaé mfa'a wop nge be nga ye bo te taté yeme zôsôa *zen, a lôte na, be taté yem, a lume mfufub *atiñ ô nga vebane be be mvus.

²² E jam e nga kui e be be, da kale e ngana nyô na: Mvu ja beta di bendôlô bé, a ngale ngôé, éyoñ a maneya woban, a beta ke bume mboto'été.