2 Minkte 8 - Kalate Zambe Nnomo a Mfefe Mfefé Nkôñelan

E beta be mam Solômon a nga bo

¹ Solômon a nga lôñe Nda Nti a *nda jé émien tañe mimbu mewôm mebaé.

² A nga beta lôñe bitisone Uram a nga ve nye a tooé bone b'Israél été.

³ Ane Solômon a nga ke Amat, Sôba a bo njôô y'été.

⁴ A nga lôñe Tadmor, e *nkôte si, a bitisone bise ba naan akum, mbie a nga lôñ Amat.

⁵ A nga lôñe Bétôroñ y'akôé a a nyô ya nké, bitison bi ne nlôñan alem, bi bili beta mimfin a mimbé mi bili mimbôñ bityé.

⁶ Balat a bitison bise ba naan akum bi too bi bi Solômon, bitison bise bi ne asu bevagoñ, e bi bi mbe asu bikabela a jôm ése Solômon a nga lôñ aval'ane nkômbane wé ô né e Yérusalém, e Libañ a e si ése a nga jôô.

⁷ E bôte bese be nga li'i e be Behétieñ, Beamorééñ, Beférézieñ, Behévieñ a Beyébuzieñ be nji bo Israél été,

⁸ ba ya bone bap be nga li'i be too si, e mvuse jap, a e mbe bone b'Israél be nji ke mane jian, Solômon a nga telé be nsamba wo bo bisaé bi alo a kui e môse wu.

⁹ Solômon a nji ke telé môt éziñe ya bone b'Israél *ôlo asu bisaé bié amu be mbe bôte mewosan, bivete bebo bisaé bé, bivete bevagoñe bé a bi bikabela bié.

¹⁰ Bivete njô bôte Solômon a nga telé bi mbe mintete mibaé a mewôm metan, mbie bi nga jôô bôt.

¹¹ Solômon a nga soo ngone Faraoñ e tisone David a zu tooé je e *nda a nga lôñ asu dé; amu a nga jô na, e minga wom a ye bo te tabe e *nda David, njô bôte ya Israél, amu e mevôm éwolo élat é nga nyiin me n'étyi.

¹² Solômon a mbe a va'a Nti mimvean mia di'ibane ngumba ata'a metuna'a Nti yôp, nde a nga lôñ ôsu ya *mbé si.

¹³ A mbe a va'ak e jôme Môze a nga bendé, asu nta'ane mame ya *môs ôse, asu besabat, asu meté me ngon a asu beta *mebôk, biyoñ bilale mbu: abô'ô belet é nji bo mvusan, abô'ô besondô a abô'ô bibem.

¹⁴ A nga telé minsamba betuni, aval'ésaa wé David a nga mane kôm, aval'ane bisaé biap bi né, Belévit, aval'ane mbe'e wop ô né, ô too na be kañe Nti a bo ésaé betuni, be too aval'ane nta'ane mam ya *môs ôse ô né, avale te fe beba'ale mimbé, be too nkaban e *mbé ôse, aval'ane minsamba miap mi né; amu avale te nde David, môta Zambe a nga bendé.

¹⁵ Be nji ke abendé njô bôt e fefel, mfa'a betuni a Belévit, nge mfa'a jam ése da fombô akum.

¹⁶ Nalé ate ésaé Solômon ése é nga kômban, e môse Nda Nti é nga bi mbôka'a, a kui e *môs é nga man. Ane ñhe Nda Nti é nga mane *mvo'é.

¹⁷ Ane Solômon a nga ke e Etsion-Géber a e Eliôt, e nsa'a mañ e sii Edom.

¹⁸ Uram a nga lôme nye besitima a bebo bisaé bé; a nga bo be bebo bisaé be David a nyoñe betalañ be or mintete minyin a mewôm metan asu njô bôte Solômon.