2 Minkte 6 - Kalate Zambe Nnomo a Mfefe Mfefé Nkôñelan

¹ Eyoñe te Solômon a nga jô na: Nti a nga jô na: A ye tabe e dibi été!

² Ve ma me lôñeya wo Nda ya tabe, e vôm wo ye tabe nnôm éto!

³ Ane njô bôt a nga kôñelan asu dé a botan ékôane bôt ése ya Israél. Ekôane bôt ése ya Israél é nga tele tetele.

⁴ Nde a nga jô na: Ebotan a Nti, Zambe Israél, Nyô a nga kobô ésaa wom David a anyu dé émien, a Nye ate a tôé mejô a nga jô a mo mé.

⁵ Ataté e *môs me nga vaa ayoñe bôte dam e si y'Ejipte, me nji tebe tison éziñ, e *meyoñ mese ya Israél été, na e nne jôé dam da ye tabe été, a me nji ke tobe môte na a bo évete ya bôte bam Israél;

⁶ ve me nga tobe Yérusalém na jôé dam é tabe été, a me nga tobe David na a bo évete ya ayoñe bôte dam Israél!

⁷ Osimesane ya lôñe Nda asu jôé Nti, Zambe ya Israél, ô mbe e nleme David ésaa wom.

⁸ Ve Nti a nga jô David ésaa wome na: Amu ô biya ôsimesan e nleme wôé été na wo lôñe Nda asu jôé dam, ô nga yeme bo na ô bi ôsimesane te e nleme wôé été.

⁹ Ve da sake wo wo ye lôñe *nda, amu e mone wôé, nyô a ye so abume dôé, nye a ye lôñe Nda asu jôé dam.

¹⁰ Nti a tôéya nkobô a nga kobô: Me tebeya éjiane David ésaa wom a me tabeya éto njôane ya Israél aval'ane nkobô Nti ô mbe, me lôñeya Nda asu jôé Nti, Zambe Israél.

¹¹ Me futiya éwolo e *nda éte été, nje é bili élate Nti a nga bo a bone b'Israél.

Meye'elane me Solômon

¹² Ane Solômon a nga tebe tetele ôsu ata'a metuna'a Nti, asu é lumu nye ékôane bôt ése ya Israél. Nde a nga same mo yôp.

¹³ Amu Solômon a nga bo ata'a mvot a telé de ézezañe nseñ; ata'a te é mbe ayap méta ébaé a étun, ndam méta ébaé a étun a ôyabe yôp méta jia a étun. A nga tebe yôp a kute meboñe si ôsu ékôane bôt ése y'Israél. Nde a nga same mo yôp a jô na:

¹⁴ A Nti, Zambe Israél! Zambe mfe a nji bo ane wo e yôp a e si: wo ba'ale élat a *mvam e be bebo bisaé bôé ba wulu vôm ô né a *nlem ôse!

¹⁵ Ajô te ô nga ba'ale jam ô nga jô e be mbo ésaé wôé David, ésaa wom; a e jam ô nga jô a anyu dôé, wo tôé de e môse wu a wo wôé.

¹⁶ Eyoñe ji, a Nti, Zambe ya Israél, ba'ale'e e be mbo ésaé wôé David ésaa wom e jam ô nga jô nye na: Wo ye bo te jemban ôsu viam e môt a tyendé wo, a too éto njôan Israél, jame da e ne ve na, bone bôé be tabe ntyel e zene jap été a be wulu, ane metiñe mam me né, aval ô nga wulu be ma.

¹⁷ Eyoñe ji, a Nti, Zambe Israél, nkobô ô nga kobô mbo ésaé wôé David ô ntoo ñhe ve tôéban!

¹⁸ Jia! Ye bebela na Zambe a ye tabe ba môta binam e *si nyô? Tame yene na yôp ba yôbe ya môp bi se nguleya yiane wo, ngumane ki e *nda me maneya lôñe nyô!

¹⁹ Ve da na a Nti, e Zambe wom, tame vô'ôlô meye'elan me mbo ésaé wôé a minja'ane mié, wô'ôk a nyoñe meye'elan me mbo ésaé wôé a ye'elane wo.

²⁰ E mise môé me tame kuiban *môs ba alu e *nda nyô, e vôme womien ô nga jô na e vana nye jôé dam da ye tabe! Vô'ôlô'ô meye'elan me mbo ésaé wôé a bo e vôme nyô.

²¹ Wo ye vô'ôlô minja'an mi mbo ésaé wôé a ayoñe bôte dôé Israél, éyoñ ba ye ye'elan e vôme nyô! Wo wo ye wôk ataté vôm ô too, ataté yôp; wo ye wôk a wo ye jamé!

²² Nge môt éziñ a bo e môt a too nye bebé *abé, a be yemete nye na a kane ngana, nge ngana éte ja boban ôsu ya ata'a metuna'a, e *nda nyôna été,

²³ wo wo ye wôk ô too yôp, wo ye bo jam éziñ a tyi'i bebo bisaé bôé ajô, asu ya ve môt a ku étom mekua, a wua mbia mboone wé e nlô wé yôp, a kalé zôsôa môt a bo nye ane *zôsôô wé a né.

²⁴ Nge ayoñe bôte dôé Israél da bômban ôsu be besiñe bé, amu be boya wo abé; nge ba bulane be wo a kañe jôé dôé, nge ba ye'elan a sili wo mam e *nda nyô,

²⁵ wo wo ye wôk ô too yôp. Wo ye jamé *abé ya ayoñe bôte dôé Israél a wo ye bulane be e si ô nga ve be a b'ésaa bap!

²⁶ Nge yôp da diban a mveñ ja bo te noñ amu *abé be ne bo wo; nge ba ye'elan e vôme nyô, a kañe jôé dôé, a bulane mvus mfa'a ya *abé dap, amu nsamelan wo ye samele be,

²⁷ wo wo ye wôk ô too yôp. Wo ye jamé *abé ya bebo bisaé bôé a di ayoñe bôte dôé Israél!

²⁸ Eyoñe mfumbale zaé a ye kui e si. Eyoñe bim a ye kui, nge bidi bia viele a nge sun ja kui, nge bitandak nge bikukum bia kui, éyoñe besiñ ba ye dili ayoñe bôte dôé bita e si jé été, e mimbé mié, éyoñe bibubua a akon mevale mese bia ye kui,

²⁹ e meye'elane mese a nja'an ôse môt éziñ a ayoñe bôte dôé ya Israél ése ba ye liti wo, a kooé na môt ase a yemeya ébubua jé a mintaé mié, a a sameya mo mfa'a ya Nda nyô,

³⁰ wo wo ye vô'ôlô e yôp vôm ô too; wo ye jamé a bulane môt ase aval'ane mezene mé me né, e wo wo yeme nleme môt ase, amu wo étam wo yeme nleme ya bôt.

³¹ Ndemben ba ye ko wo woñ a wulu e mezene môé nté ôse ba ye nyiñ éfuse si ô nga ve b'ésaa bangan!

³² Avale te fe nneñ, nye a nji bo môte ya ayoñe bôte dôé Israél, éyoñ a ye so e si é n'ôyap, amu jôé dôé e n'anen, akule wo dôé é ne ngu a e wo wôé ô ne nsaman, éyoñ ba ye zu ye'elan wo e Nda nyô,

³³ wo wo ye wôk e yôp vôm ô too, nde wo ye ve jôm ése nneñ a sili wo, éyoñe te *meyoñ me bôte mese ya *si nyô ma ye yeme jôé dôé, asu ya ko wo woñ, aval'ane ayoñe bôte dôé Israél, a éyoñe te ba ye yeme na ba loone jôé dôé e *nda me maneya lôñe wo nyô.

³⁴ Eyoñ ayoñe bôte dôé da ye kui a ke wosane besiñe bé, be tôñôk e zene wo ye lôme be; nge ba ye'elane wo, be fombô'ô mfa'a ya tisone nyô, nje ô nga top, a mfa'a ya Nda me maneya lôñe jôé dôé,

³⁵ wo ye wô'ô meye'elan a minja'ane miap ô too yôb a volô be.

³⁶ Eyoñ ba ye bo wo *abé, amu teke môt a ne te bo *abé, éyoñe wo wô'ô be ôlun a ve be e be besiñ, éyoñe bôt ba ye bi be minkôm ba ye kee be minkôm e si é n'ôyap nge bebé,

³⁷ nge ba bulan e be bebien, be too si ba ye bo minkôm, nge ba bulane be wo a ja'é wo mam e si be ne minkôm be jô'ô na: Bi boya *abé, bi boya bikop, bi boya mbia jam!

³⁸ Nge ba bulane be wo a *nlem wob ôse a e nsisime wob ôse, a nge ba ye'elane wo e si minkôme miap, e vôm be nga kee be minkôm, mesu map me lôô mfa'a si ô nga ve b'ésaa bap, tison ô nga top a e *nda me lôñeya jôé dôé.

³⁹ Wo ye wô'ô meye'elane map a minja'ane miap e yôp vôm ô too, a wo ye volô be. Wo ye jamé ayoñe bôte dôé *abé be nga bo wo!

⁴⁰ Eyoñe ji, a Zambe wom, e mise môé me kuiba'an a melo môé me tame vô'ôlô meye'elan ma boban e vôme nyô!

⁴¹ Eyoñe ji, a Zambe a too nnôm éto, kôlô'ô si, za'ak a tabe e vôme wôé ya awo'on, womien a éwolo ya ngule jôé. Betuni bôé, a Zambe a too nnôm éto, be jaé nyian ane ngômesan, a *bebuni bôé be ntoo ve vak e mvom été.

⁴² A Zambe a too nnôm éto, te ben éñwôé a ne *ñwo'one mbon. Simesa'ane mbamba be mam mese ô nga bo David mbo ésaé wôé.