2 Minkte 4 - Kalate Zambe Nnomo a Mfefe Mfefé Nkôñelan

¹ A nga bo ata'a metuna'a mvot, ayap méta awôm, ndam méta awôm, ôyabe yôp méta étan.

² A nga bo mañ me mvot méta étan, ataté aku'u di a kui di avok, éve'ela jé é too njiñelete, ôyabe yôp tañe méta ébaé a étun, mbôma'an a too tañe méta awôm a étan.

³ Bive'ela beyôm benyak bi mbe e mañ me mvot mete si, bi bôma'ane me vôm ase. Méta ése é nga bili beyôm benya'a bete mewôm mebaé minnoñ mibaé. Be nga bo benya'a bete éyoñe fe be nga bo mañ me mvot.

⁴ Mañ me mvot me nga bete e beyôm benya'a be mvot awôm a bebaé yôp; belaa y'été be nga lôô mfa'a y'akôé, belaa mfa'a jôp da dim, belaa mfa'a ya nké a belaa mfa'a jôp da tôô, memvuse map ki mfa'a ya été, e mañ me mvote si.

⁵ Nku'u mañ ô mbe afip sentiméta muam. Nka y'été ô mbe nkôman ane nka beta *élaé a ne éve'ela sam ayañ. Be mbe nguleya futi mendim été tañe lita toyini ntet a mewôm mebaé.

⁶ A nga bo befandé awôm a telé betan mbo nnôm, betan mbo ngal asu mewoban; be mbe fe be sôbe mimvean mia di'ibane ngumba été. Mañ me mvot me mbe asu betuni na be woban été.

Biôm bikpwembé bi nga veban

⁷ A nga bo bibe'e belambe awôm a or, aval'ane njôane y'été ô mbe. A nga telé bie e beta aba ya *nda Zambe, betan e mbo nnôm a betan e mbo ngal.

⁸ A nga bo fe betawôlô awôm a telé fe be e beta aba ya *nda Zambe, betan e mbo nnôm a betan e mbo ngal. A nga bo fe bisua bi or ntet.

⁹ A nga bo nseñ asu betuni a e beta nseñ a ne anen, nalé fe mimbé ya nseñ a nga tube mimbô'ô y'été a mvot.

¹⁰ A nga telé mañ me mvot e mbo nnôme ya nké mfa'a da tôô.

¹¹ Uram a nga bo memvé, biwôlô asup a bisua ba futi mendim *ntuni a miam ata'a metuna'a, éyoñe te a nga mane bo ésaé ése njô bôte Solômon a nga bendé nye asu Nda Zambe:

¹² Beta mekôn mebaé me bili biyeyase mendo'o mebaé e so'o mekône yôp a mevote mebaé asu ya buti biyeyase mendo'o bi mbe e mekône yôp,

¹³ bibuma bi grenade mintete minyin asu mevot mebaé; avot ése minnoñ mi grenade mibaé asu ya buti biyeyase mendo'o ya mekône yôp.

¹⁴ A nga bo biteba'a a bo befandé e biteba'a yôp;

¹⁵ Mañ me mvot avale dé étam, beyôm benyak awôm a bebaé be too me si.

¹⁶ Nalé fe memvé, biwôlô asup, bilum, biôm bite bise mbie Uram-Abi a nga bo njô bôte Solômon asu Nda Nti, bi mbe mboon a mvot ja ngemban.

¹⁷ Njô bôt a nga bo na be nyemé bie e nje'ese Yordan, e zañe Sukôt a Séréda.

¹⁸ Solômon a nga bo biôm bite étua abui akui vôme ya bo te fe yem abime mvot é mbe.

¹⁹ Solômon a nga bo fe biôm bivo'o bise asu *nda Zambe: ata'a metuna'a or; betawôlô e vôm be mbe be beté'é e belet é n'étyi;

²⁰ bibe'e belambe a belambe be nya or bap, mbe be nga yiane ba'é ôsu ya vôm a n'étyi, avale njôan ô né,

²¹ mesam belambe a mebas me or, or a dañe *mfuban.

²² Atyeñ, bisua ba futi mendim betuni ba miam, bilaé, bikanda bi nduan mboon a nya or; bivin bi or asu *mbé ya *nda été, anyiine vôme y'étyi ya bityi a asu *mbé ya Nda, anyiine ya Nda Zambe.