2 Minkte 33 - Kalate Zambe Nnomo a Mfefe Mfefé Nkôñelan

Ejôé Manasé

¹ Manasé a nga bili mimbu awôm a mibaé éyoñ a nga tebe njô bôt, a nga jôô mimbu mewôm metan a mitan e Yérusalém.

² A nga bo mam me ne *abé e mise me Nti. A nga vu b'angôndô be mam meyoñe Nti a nga wôlé biôm ôsu bone b'Israél be nga bo.

³ A nga beta lôñe bito ya bikôndô'ô yôp, mbie ésaa wé Ezékias a nga tyam, a nga lôñe Bebaal meta'a metuna'a, a nga telé mekône m'azezambe a nga kute meboñe si ôsu ya nsamba ateté ya yôp a kañe wô.

⁴ A nga lôñe meta'a metuna'a e Nda Nti a nga jô na: Jôé dam da ye tabe Yérusalém nnôm éto.

⁵ A nga lôñ ateté ése ya yôp meta'a metuna'a e minseñe ya Nda Nti.

⁶ Emien a nga di'i bone bé nduan e mbi'ili Bén-Inom, a nga bo majik a ngbwee; a nga telé bebi'i bekôn a mimvimvi'i; a nga soñe Nti nté ôse a nga ke ôsu a bo mam me n'abé e mise mé.

⁷ A nga telé *ngunemelan é ne nkpwelan a nga bo e Nda Zambe; e too ke na Zambe a nga jô David a mone wé Solômon na: E Nda nyôna a e Yérusalém me nga tobe e *meyoñ mese y'Israél été na ma ye futi jôé dam nnôm éto.

⁸ Ajô te ma ye bo te beta kee Israél ôyab a si me nga ve b'ésaa, nge ba bômbô évévé ya bo mam mese me nga liti be e be Môse: metiñe mese, memvinda a minjôan.

⁹ Manasé a nga yale Yuda a bôte be too Yérusalém fé a kui na be nga bo *abé a dañe meyoñe Nti a nga jian ôsu ya bone b'Israél.

¹⁰ Ane Nti a nga kobô Manasé a ayoñe dé, ve be nji ke tabe ntyee.

¹¹ Ajô te Nti a nga zuu bivete ya nsamba mewosane njô bôte ya Asiri na bi wosane be; be nga bi Manasé a menen m'akop, be ka'a nye a ngôkobe mvot é ne mimba'a mibaé a kee nye Babilôn.

¹² A too ôlune wé été, nde a nga je'e Nti, e Zambe wé, amu a nga sili émiene si beta nsilan ôsu Zambe b'ésaa bé,

¹³ a a nga ye'elane nye. Nde a nga kañese, ve wô'ô meye'elane mé a bo nye na a beta zu e Yérusalém a kee éjôé ôsu. Eyoñe te Manasé a nga yeme na Nti Nye a ne Zambe.

¹⁴ Eyoñe mam mete me maneya a nga lôñ akak atane ya tisone David, e Gihôn mfa'a jôp da tôô, e mbi'ili, a kui anyiine *mbé bekos; aka'a te e mbe e bôma'an Ofel, a a nga bete de ôyabe yôb abui; a nga futi bivete bezimbi e bitisone bise ya Yuda bi bili alem.

¹⁵ A nga vaa bezambe bikuu a éve'ela jé e Nda Nti, nalé fe meta'a metuna'a mese a nga lôñ e nkôle ya Nda Nti a e Yérusalém; a nga wua me e tison atan.

¹⁶ A nga lôñ ata'a metuna'a Nti, a nga tyi'i mimveane ya nlatane ngbwa a mvean akéva été yôp, a a nga jô Yuda na a bo Nti, Zambe ya Israél ésaé.

¹⁷ Ve bôt be nga ke ôsu a beta tyi'i biôm e bito bikôndô'ô yôp, ve be tyi'i bie fo'o v'asu Nti e Zambe wop.

¹⁸ Mimboon mivo'o Manasé, meye'elan a nga ye'elane Zambe wé, mejô beyene mam be nga kobô nye a jôé Nti, Zambe Israél, me ne ntilan, e mimboone bejô bôte ya Israél.

¹⁹ Meye'elane mé a avale Zambe a nga yalane nye, *abé dé a melo mé, mevôm a nga lôñe bito bikôndô'ô yôp a telé mekôn m'Akéra a bive'ela bi *ngunemelan, te na a sili émiene si, mam mete me ne ntilan e kalate Hôzayi.

²⁰ Manasé a nga bômbô vôme wua ba b'ésaa, be nga jame nye e *nda jé. E mone wé Amon a nga jôô éjiane jé.

Amon njô bôte ya Yuda

²¹ Amon a nga bili mimbu mewôm mebaé a mibaé, éyoñ a nga tebe njô bôt; a nga jôô mimbu mibaé e Yérusalém.

²² A nga bo mam me n'abé e mise me Nti, aval ésaa wé Manasé a nga bo; a nga tyi'i bengunemelane bese ésaa wé a nga bo biôm a kañese be.

²³ A nji suu émiene si ôsu Nti avale Manasé ésaa wé a nga bo, ve nye, Amon, a nga bo mame ya dañe ve émiene mekua.

²⁴ Bebo bisaé bé be nga bôndé fe'e ya bo nye *abé a wôé nye e *nda jé.

²⁵ Ve bôte ya si Yuda be nga wôé ba bese be nga bôndé fe'e ya bo njô bôt Amon *abé, a be nga telé mone wé Yôzias éjiane jé.