2 Minkte 31 - Kalate Zambe Nnomo a Mfefe Mfefé Nkôñelan

Ezékias a beta kôm ésaé betuni

¹ Eyoñe mam mete me nga man, bôte bese ya Israél be nga too be nga so e bitisone ya Yuda a bu'u mekône m'azezambe a ba'é fe mekône m'Akéra, a sô'ôlô bito bise ya bikôndô'ô yôbe si; nalé fe meta'a metuna'a ya Yuda ase a Bényamin, Efrayim a Manasé. Eyoñe te bone b'Israél bese be nga bulan e bitisone biap.

² Ane Ezékias a nga telé betuni a Belévit ane minsamba miap mi né, môt ase aval'ane ésaé jé é né, betuni a Belévit asu mimvean ba di'i ngumba, mimvean ya nlatane ngbwa, ésaé nkañan, asu *mebôk a bia ya ékaña'a, e mimbé ya minkane mi Nti.

³ Njô bôt a nga ve ngab akume dap asu mimvean mia di'ibane ngumba, mi ya mametyé a mamengô'é, a mi ya Sabat, meté me ngon a *mebôk, aval é ne ntilan e metiñ me Nti.

⁴ A nga jô ayoñ a e bôt be too Yérusalém na be ve e ngap ja yiane betuni a Belévit.

⁵ Eyoñ nkobô wuna ô nga mialan, bone b'Israél be nga ve *bembômô be fôn, mfefé woon, mbon, wôé a biôm bise bia yô afan abui abui; be nga soo fe *ngab awômô ya biôme bise.

⁶ Avale te fe bone b'Israél a Yuda be nga too e bitisone ya Yuda be nga ve *ngab awômô ya beta mimbame biyem a bone mimbame biyem, a *ngab awômô ya biôm bi n'étyi mbie bi nga veban asu Nti e Zambe wop, a mbie be nga bo abui mevis.

⁷ Be nga taté mbôane mevis e ngone lale, a man e ngone zamgbwale.

⁸ Ane Ezékias ba be bivete bié be nga zu yene mevis a botane Nti a ayoñe bôte dé Israél.

⁹ Nde Ezékias a nga sili betuni a Belévit minsili ajô mevise mese.

¹⁰ Eyoñe te *ntuni nnen Azariahu ya *nda Sadok a nga yalane nye na: Nté ane be nga taté na ba zuu biôm ba kandé e Nda Nti, bi kusa di biôm mebum me kui bia minlem, *mebuka'a me ne fe v'abui abui, amu Nti a maneya botan e bôte bé; abime da bebe yôp nde é ne nta'ane mevise ma.

¹¹ Ane Ezékias a nga ve abendé na be kôme bitune bi *nda e Nda Nti; nde be nga kôme bie.

¹² Ane be nga soo biôme bi mbe nkandan, *ngab awômô a biôme bi n'étyi avale bi mbe. Mone lévit jôé na Kônaniahu nye a nga ba'ale bie, ba monyañe wé Siméyi a too ba'a.

¹³ Yehiél, Azaziahu, Nahat, Asaél, Yérimôt, Yôzabad, Eliél, Yismakiahu, Mahat a Benayahu, be mbe befombô ésaé, Kônaniahu a monyañe Simeyi be too be bivet, aval'ane abendé njô bôt Ezékias a Azariahu, évete ya *nda Zambe é mbe.

¹⁴ Mone Lévit jôé na Koré, e mone Yimna, mba'ale *mbé ya jôp da tôô, a nga ba'ale mimvean mia veban ane *nlem wo kômbô, mie be nga ve Zambe, asu ya kabe biôm ba kandé mfa'a Nti a biôme bia dañ étyi.

¹⁵ E bitisone betuni: Eden, Minyamin, Yasua, Semaéyahu, Amariahu a Sekaniahu be nga tele nye mefefe asu ya kabe bobenyañe biôme *mvo'é, benya bôtô a bongô, aval'ane minsamba miap mi né,

¹⁶ Ataté ba be mbe nlañan be too mimbu mila a lôte valé, a kui ba bese be mbe be nyi'ine Nda Nti *môs ôse asu ya bo ésaé, aval'ane biyoñ bi ésaé biap a minsamba miap bi né;

¹⁷ be nga ve fe betuni be mbe nlañan, ane menda me bôte map me né, nalé fe Belévit, ataté mimbu mewôm mebaé, a lôte valé, aval'ane biyoñ bi ésaé biap bi ne ntelan a aval'ane minsamba miap mi né,

¹⁸ be nga ve fe ékôane bôt ése é nga lañeban, a bendaé bap bese e binga bap, bobefame bap a bobebinga, amu be nga ve bebien ngumba asu ésaé ya vôm a n'étyi.

¹⁹ Mfa'a bone b'Aron, betuni mbe be nga too afan, mefôla ma bômane bitisone biap, tison ése é nga bili mingum mi bôt, be lo'one be a môé map, asu ya ve bôte bese mengap e betuni été; be nga ve fe Belévit be nga lañeban mengap.

²⁰ E jam Ezékias a nga bo e Yuda ase été nde le; a nga bo ane mvaé, *zôsôô a bebela bi né, e mise me Nti, e Zambe wé.

²¹ Esaé ése a nga bo été asu nkañane ya Nda Zambe, metiñ a mebendé, a jeñe Zambe, a nga bo je a e nleme wé ôse, a mam me nga wulu nye *mvo'é.