2 Minkte 30 - Kalate Zambe Nnomo a Mfefe Mfefé Nkôñelan

Ezékias a loone bone b'Israél abô'ô Pak

¹ Ane Ezékias a nga lôme bôt e Israél ase a Yuda. A nga tili fe bekalate Efrayim a Manasé na be zu Nda Nti e Yérusalém a bo abô'ô Pak asu duma Nti, Zambe Israél.

² Njô bôt, bivete bié a ékôane bôt ése be nga bo ékôan e Yérusalém asu ya telé abô'ô Pak e ngone baa,

³ amu be nji bo nguleya jeme de éyoñ ja yian, amu valé betuni be ngenan teke tune bebien abime tañe bôt da yian, a na valé bôt be ngenan teke sulan e Yérusalém.

⁴ Amu nkañesan njô bôt a wu ékôane bôt ése,

⁵ nde be nga tyi'i na be kate foé e Israél ase, ataté Birséba a kui Dañ, na bôt be zu Yérusalém a jem abô'ô Pak asu duma Nti, Zambe Israél. Amu jama bôt a nji fe beta jeme de aval e ne ntilan.

⁶ Ane minlôman mi nga wulu e si ése ya Israél a Yuda, be bili bekalate njô bôt a nga mane san ba be bivete bié; be nga yôtan aval ane njô bôt a nga bendé na: A bone b'Israél, bula'ane be Nti, e Zambe Abraham, Izak a Israél, nalé nye fe a ye bulane be mia, a mia *mebuka'a me nga fam e mo bejô bôte ya Asiri.

⁷ Mi nji yiane bo ane b'ésoo benan a bobenyoñe benan, mbe be nga bo Nti, e Zambe b'ésaa babe melo, ajô te a nga wua be e nju'u été avale mi lôô di.

⁸ Eyoñe ji te boone melo ane b'ésoo benan; su'ane miabebiene si be Nti, za'an e *nda jé é n'étyi a nga mane tune nnôm éto, a bo'one Nti, e Zambe wônan bisaé, nalé ate mbia ayaa wé a ye kôlô be mia.

⁹ Nge mia bulane be Nti, bobenyoñ a bone benan ba ye yene *mvam e be ba be nga kee be minkôm, a ba ye bulan zu e si mi too nyô; amu Nti, e Zambe wônan a ye bo te lume mia mvus nge mia bulane be nye, amu a ne *mvam a nkoone bôt éngôngo.

¹⁰ Bemate mimbi be nga lôt e tison ése y'Efrayim a Manasé a kui Zabuloñ. Ve bôt be nga woé a kpwe'ele be.

¹¹ Ve da bôte b'éziñe ya *meyoñ Azér, Manasé a Zabuloñ be nga yeme bikobe biap a ke Yérusalém.

¹² E Yuda fe wo Zambe ô nga bo ésaé ya ve bôt avale nleme da ya bo abendé njô bôt a bivete bié aval'ane nkobô Nti ô mbe.

¹³ Ezu'u bôt é nga sulane Yérusalém asu ya jem abô'ô belet é ne te mvusan e ngone baa: ésulane te é mbe anen.

¹⁴ Bôt be nga kôlô si a tyam meta'a metuna'a me mbe Yérusalém, a tyame fe bisua ba di'i beôlobinda a wua bie mbi'ili sédroñ.

¹⁵ Wôna be nga wôé Pak e ngone baa é too melu awôm a menyin. Amu ôsone betuni a Belévit be nga wôk, nde be nga tune bebien. Be nga ve mimvean ba di'i ngumba e Nda Nti été.

¹⁶ Be nga too éto jap be wô'ô zu ba tabe, aval'ane atiñe Môze, môta Zambe e né, a betuni be nga miam e metyi be nga nyoñe mo Belévit.

¹⁷ Amu e bôt be nji ke tune bebien be mbe abui ésulan été, nde Belévit be nga tebe na ba tyi'i biyeme ya Pak asu bôte bese be mbe *mfuban, ane be ne tune be mfa'a Nti,

¹⁸ amu beta ngabe ya bôt, abui ya ba y'Efrayim, Manasé, Isakar a Zabuloñ be nji ke tune bebien. Be nga di Pak, teke tôñ aval é ne ntilan, ajô te Ezékias a nga ye'elan asu dap a jô'ô na: A Nti, ô ne *mvam, jamé'é

¹⁹ ba bese ba ve nleme wobe na be jeñe Zambe Nti, Zambe b'ésaa bap, teke taté tune bebien!

²⁰ Nde Nti a nga wô'ô Ezékias a nyii bôt.

²¹ Nalé ate bone b'Israél be nga too Yérusalém be nga bo abô'ô fembé é ne te mvusan tañe melu zamgbwa a meva'a abui. Môs ôse Belévit a betuni be nga kañe Nti a ngul ése ya bibômebômé biap asu duma dé.

²² Ane Ezékias a nga sek e Belévit bese be nga bili mbamba ñwô'ane ya ésaé Nti. Tañe melu zangwa be nga di e ngab é ne be mvean; be nga ve fe *bityi'a ya nlatane ngbwa, be kañe Nti, Zambe b'ésaa bap.

²³ Ekôane bôt ése é nga kui tyiñe ya beté melu m'abô'ô mefe zamgbwa, a be nga bo abôk melu zamgbwa a meva'a mese,

²⁴ amu njô bôt Ezékias, njô bôte ya Yuda, a nga kandé biyem asu ésulan: beyôm benyak toyini, mintômba, bikela toyini zamgbwa, a bivet bi nga kandé asu ésulan: beyôm benyak toyini, mintômba a bikela toyini awôm. Abui betuni be nga tune bebien.

²⁵ Ane ékôane bôt ése ya Yuda, betuni a Belévit, e bôte bese be nga so Israél a mintabe mi nga so, be nga vak abui.

²⁶ Beta mevak me nga boban e Yérusalém. Ataté melu me Solômon e mone David, njô bôte ya Israél, jôm avale te é nji tame boban e Yérusalém.

²⁷ Nde betuni a Belévit be nga kôlô si a botan ékôane bôt. Metyiñe map me nga wô'é a meye'elane map me nga ke a kui éto y'étyi Nti é ne yôb été.